ပကဲၪၥၭဘၪ့ကဂၩဂီၩ့ အ့ၪပနဲၩလၨၪဆၧနီၪ မွဲဒၪပဆၧဆီၫ့မီၪ့ဆီၫ့မၬၡၩနီၪလီၫႉ ပကဲၪၥၭ ဘၪ့ကဂၩဂီၩ့ အ့ၪမွဲပၥၭကွံၩဆၧနၬလၨၪနီၪ မွဲဒၪပခိၪနုၬၡၩနီၪလီၫႉ ပကဲၪၥၭဘၪ့ကဂၩဂီၩ့ အ့ၪမွဲ ဆၧမ့ၬလဲၩ့ၥၭဂဲၫ့အီၪအၪနီၪ မွဲဒၪပၥၭလလၧၫ့ဎွ့ၩဘၪလီၫႉ ပကဲၭၥၭဘၪ့ကဂၩဂီၩ့ ယၧၩမၬယဆၧ ဘိၪ့ဘၪအၧၩ့ထဲဖိၭယီၩဒ့ၭ ပကဂၪ့အံၪဂၪ့အူၭဘဲၫနီၪဂီၩ့ အ့ၪမွဲပကထိးစၪခွံၬပၥၭစွါဘဲၫ မွဲဒၪပၥၭ ဆါနီၪလီၫႉ
         ပကဲၪၥၭဘၪ့ကဂၩဂီၩ့ ထၧၩ့ဆၧကဲၪထၪ့ဒၪနးမံၩ့ အယီၩမွဲဒၪကကဲၪထၪ့ဆၧအဂ့ၩလီၫဘ့ၩ ပကစီၪဘဲၫနီၪဂီၩ့ အ့ၪမွဲပကထွံၩလၩ့ပခၪ့လၧ ဆၧဘိၪ့အမ့ၬယၫနီၪဘိၭ အယီၩမွဲဒၪ ပလနဲၩလၩ့ ဘၪပၥၭနီၪလီၫႉ ၥဒၪ့နီၪ အခိၪနုၬအီၪအ့ၬလါနၫ့ကအီၪအၪ့ဘၪ ဂ့ၩဂ့ၩဘၪဘၪအဂး ခုၪ့လၩ့ဒၪအ ဖၧၩ့ၥ့ၪဝ့ၫလီၫႉ အခိၪနုၬဂဲၫပၫထဲးၦၡၩလဖၪနီၪ ပအီၪဘၪ ပကလီၩ့ဒိၭနဲၩ့ပၥၭလၧၦၡၩအအီၪ စွါဘဲၫ ကြၨၭပညၩၡၫၥဒၪ့လဖၪလီၫႉ

ဆၧၥၭမၧၫ့လၩ့ဆ့ၬလၩ့ယွၩၥၭဘၪ့လဖၪနီၪ လီၩ့ယိယိနးထံၪႉ အၥၭဂၭဂီၩ့ဂီၩ့ ဆုးလ့ၩထၪ့ လၧဆၧမ့ၬယၫလန့ဘၪ ဒဲ  ဆၧဘိၪ့အအၧၩ့လဖၪမၩနၧၩ့မၩစၪအဝ့ၫၥံၪအကၠီၩ့ ထိးစၪခွံၬအၥၭႇ ၥၭဘၪ့လဖၪအီၪဝ့ၫဒၪအၪမၬလီၫႉ 

ပစၪဝ့ၫဒၪကကၠၪအကၠီၩ့ ပကစီၪဘၪပကစၪ ပဆၧၥၭမၧၫ့ထၧၩ့ဖျီၩ့ယၫ ဘဲၫနီၪစွါဘဲၫ ပကလ့ၩထၪ့လ့ၩထီၫအခွးနီၪ မွဲကလၩ့မါနီၪလီၫႉ

ဆၧထိစိၩဒဲ ဆၧကျ့ၭစၨၭလအီၪဘၪၥၭဘၪ့လဖၪနီၪ ကလ့ၩထၪ့လ့ၩထီၫအဂး ကၪဂဲၩဝ့ၫဒၪလီၫႉ ၥၭဘၪ့ကိၭဂၩဒ့ၭ ဆၧမံၫမးလၧ ပဘၪယိမိၬလၫ့န့နီၪ ပကြၨၭအီၪက့ၪထၬကိၭဂၩနီၪလီၫႉ

ၥၭဘၪ့လၧအဆၧကိၪ့ဘၪကိၪ့ၥ့ၪထီၫဝ့ၫဒၪလဖၪနီၪ ဘဲၫမၩဒိၪထၪ့ထီၫထၪ့လၩ့အၥၭန့ အၥိၭ မၩလ့ၩထၪ့လ့ၩထီၫၦဂူၫဂၩန့ဝ့ၫလီၫႉ ၥၭဘၪ့လၧအစီၪဒီၩ့ဘၪခီၩ့ၦၡၩၥ့ၪလဖၪနီၪ ဆၧအဲၪ လၩ့ၥၭအီၪၡၩဝ့ၫအၥိၭ လီၩ့ထိးခ့ၬၦဂူၫဂၩအဆၧပွံၩဆၧထၩ့လဖၪနီၪလီၫႉ  ၥၭဘၪ့လဂၩအလူ အ ဎွ့ၩနီၪ လမွဲဘၪမ့ၬဎံၪယၫဘွၩတၭ မွဲဒၪလၧ မၩထၪ့ဆၧန့ လန့ အဂဲးစီၩ့အီၪ လအီၪနီၪလီၫႉ

 ဆရၫအီၫ့ၥ့ၩ