လၧကထံၪဒၪအိၩ အမံၩ့ဎိၩဝ့ၫဒၪ fbဖၫ့ခိၪ ဖါကဂၩနီၪလၧအဝ့ၫ အဖိၪမုၪအဆၧအီၪဎုၬမုၬဖၧၩ့ မၪလူၬထွ့ၫဘၪၦလၧ ကကဲၪထၪ့အဝ့ၫအမါလဂၩ ဘၪထွ့ၫလၧ လၧယၫခီၫအဖိၪမုၪအခံးအဂးအဂဲးလဖၪနီၪ မွဲမၩဘၪထံၭၦၡၩအၥၭလဖၪန့ဝ့ၫဒၪဒဲ မၩလၩ့ယွၩၦၡၩအမ့ၬထံၫန့ဝ့ၫဒၪအၪမၬ ဖါလဂၩအဆၧအဲၪဆၧကွံၩနီၪ မွဲပဒၪဘၪနီၪလီၫႉ ဘဲၫယီၩ ယအဲၪဒိၭဆုးထဲၩ့ဖ့ၪနဲၪအ့ၪ ဘၪနၥံၪဆၧဂၩ့မၧၫ့နီၪလီၫႉ

ဆၧၫ့ထီမုဆၫကနံၩယီၩနီၪ ဆၧအဲၪတၩ့ဖိၪၥံၪအကျၩ မွဲလၧလလၩ့ဂၬဘၪၦၡၩအဆၧအီၪက့ၪၥုၪ့အီၪက့ၪၥၭဒဲ အဆၧဖံၭ ဆၧမၩလဖၪအကၠီၩ့ ဆၧမၪလအီၪဘၪနးမံၩ့ ဖိၪၥၪဆံၭဖိၪၥံၪလဖၪ ဘၪထိးခွံၬၡိၬအၥၭ ဘၪထိးမၩၥံၫအၥၭ အီၪအၪထၪ့ဝ့ၫ နီၪလီၫႉ ၦၡၩအၪဒၪဆၧနီၪ မိအၪ့န့မူၩဒၩအၥၭ လအီၪလၧၩ့ဘၪနီၪလီၫႉ ဆၧနီၪအကၠီၩ့မိလၩ့စဲၪဖါလၩ့စဲၪလဖၪ အီၪအၪထၪ့ဝ့ၫ နီၪလီၫႉ အၪဒၪဆၧနီၪ မိလၩ့စဲၪလဖၪ ဂဲၫအၪထၪ့ဝ့ၫ အၪမၬနီၪလီၫႉ

ပၥုၪ့ထၪ့ဂံၪ့ဒီၪ့ကဖျိၪ့ဂီၩ့ ထၧၫ့ကဂုးခၧၫ့လဆိၩယၫနီၪ မုဆၫကနံၩယီၩအဂး ကၪဂဲၩဝ့ၫဒၪအၪမၬနီၪလီၫႉ ဆၧအဲၪဘိၩ့ လိၬၥၭလဖၪနီၪ မုဆၫကနံၩယီၩ အီၪအၪထၪ့ဒဲ ဂဲၫယီၫထၪ့ဝ့ၫအၪမၬနီၪလီၫႉ ဆၧနီၪအကၠီၩ့ဖါယီၩ ကနံၩကကၠၪကိ အ့ၪမွဲအဖိၪ မုၪယီၩ ကဘၪဒၪဆၧၫ့ယၫဘဲၫနီၪၥိၭစွါဘဲၫ ထီးမၩဘၪထံၭအဖိၪမုၪအၥၭလဂ့ၩ ဂဲၫၥိၫ့ထဲၩ့အဖိၪမုၪနီၪ လၧအဝ့ၫအအီၪအဂး မၪလူၬထွ့ၫထၬအမါနီၪလီၫႉ ဖါအဆၧအဲၪယီၩ ဎိၩဒိၪလၩ့မဲၩဝ့ၫဒၪဎွ့ပၥ့ၪလဲၪႉ

ၥၭဘၪ့လၧကထၪ့ၡါလဖၪဆ့ အၪ့ဎၬထၬထံၫထံၫဆၭဆၭလါဆံၭႉ ပကအီၪဎုၬအဂးပရွံထၪ့ထၬၦၡၩယီၩ ပကထဲၩ့အီၪ မၧၫ့ဎုၬလဆိၩယၫကန့အဂး ကျ့ၭစၨၭလါဆံၭႉ ၦၡၩလၧပအီၪဎုၬထၬယီၩ အ့ၪလမွဲဘၪဆၧနးမံၩ့လါနၫ့ အဝ့ၫၥံၪအမိအဖါအဂး နီၪ အဝ့ၫၥံၪယီၩ မွဲၦလၧအလူဒိၪဎွ့ၩဒိၪအအီၪထုၬၦၡၩလဖၪအဂဲး အီၪနၪ့ထၪ့ဘၪလါဆံၭႉ ထီးမၩဘၪထံၭဘၪနဲၪ့ဘၪ ၦၡၩအဖိၪအဒံၪအၥုၪ့အၥၭဒဲ အနးခီၫ့မိၡါနီၪလဂ့ၩႉ

လၧဆၧထိၪတွၭအၪ့ဎၬအဂ့ၩဒိၪထုၬအဖၧၩ့ ကျ့ၭစၨၭအီၪမၧၫ့ဎုၬလၧအဝ့ၫလၧဆၧတီၩဆၧလီၩ့ဖၧၩ့ထၧၫ့ပၥံၫပၡါလါဆံၭႉ ၦလၧပအၪ့န့ထၬဝ့ၫဒၪလဂၩယီၩ မွဲပဘၪဂဲၫထဲၩ့အၪ့လူလၩ့ထၬလၧအဆံၭဆံၭအိၩမွဲအ့ၬႉ ထၧၫ့အဝ့ၫၥံၪယီၩ ကထီၩ့လၧပစူၪဖၧၩ့ မုကနံၩအထီ ၦလၧအဘၪဂဲၫထဲၩ့လုအၪ့လုအီၩအဝ့ၫၥံၪ ဘၪဂဲၫထဲၩ့ယိထဲၩ့ခွါထဲၩ့အဝ့ၫၥံၪနီၪ မွဲဒၪလၧအဝ့ၫအမိအဖါၥံၪတၭ မွဲပကဘၪဒၪထၪ့ အဝ့ၫၥံၪအခိးအတၩထၧၫ့အၥ့ၪနီၪလီၫႉ

ပထၧၫ့မၫထၧၫ့ဝၩလဖၪဆ့ ထီးနၧၩ့ဘၪစၪဘၪလိၭၥၭလဂ့ၩႉ ယၫ့ၥၭလိၬၥၭ နၪၥ့ၪလိၬၥၭဂီၩ့တၭ လၧဆၧစီၪဒီၩ့ဘၪဎီၩ့လိၬ ၥၭဖၧၩ့ ထဲၩ့အီၪမၧၫ့ဎုၬထၧၫ့ပၥံၫပၡါလါဆံၭႉ ပကဘၪပၧၩ့ဆုၬထၬပၥၭလုနီၪ လၧပလၩပဖၩ့ဆ့လိၪဝ့ၫဒၪအဂဲး မုကနံၩယီၩယရၩ လၩ့စိၩအ့ၪဘၪနၥံၪဂီၩ့ ပကအီၪပထုၬထၬ ပဆၧထံၫလၩ့ဒီၪလၩ့ လၧအလးထယီၩနီၪလီၫႉ