လၧၥဲၫ့ထံၫခး ဖးဖီၩ့လံၬလဲဖၧၩ့နီၪ မွဲပကဒၪဘၪၦဖျိၩ့ဆၨၩအဂဲးဖိၬနီၭအ့ၬ ဒဲ ကအီၪဒၪကဆံၭကခ့ၭနီၪလီၫႉ အီၪထးလၧ ၦဖျိၩ့ၡါဖၧၩ့နီၪ လထီၩ့ဒံၭဘၪ ၁၂ ဒဲ ၁၃ယၩနံၪ့ ၥဲၫ့ခးလံၩခံၫကကဲၩ့ခီၫ ခီၫလၧၥဲၫ့ၥံၪ လဂဲၫအီၪဒံၭဘၪနီၪ ၦဖျိၩ့ဆၨၩဖိၪၥံၪအီၪထၬဝဲၩ့ အကၠီၩ့ လီၩ့ထၬဝ့ၫဒၪလီၫႉ ဆၧလီၩ့ဆိၪထၬဆၧယီၩ မွဲၦကိၪ့ၥ့ၪၥံၪလဖၪ ထိးဆၧၫ့ကၠၭဝ့ၫဒၪ နီၪလီၫႉ

ခၠ့ၩမဲၫ့လးကျဲၩ့ ပ့ၩထံၫချိၬနီၪ မွဲၦဖျိၩ့ဆၨၩဖိၪၥံၪဂဲၫအီၪအခၪ့ထံၭၥၫ့ဂီၩ့ ၥဲၫ့ဆၨၩၥံၪလဖၪ ဂဲၫထီၩ့အခၫ ဖျိၩ့ၥံၪလဖၪ ဘၪဂၭဎ့ၬလၫ့ဆၧလးနီၪဂီၩ့ လၧခဲၫ့ ၥဲၫ့ၥံၪနီၪ အစီၩ့အမၩ့ဂဲၫဎိၩ့ထၪ့ထဲၩ့အကၠီၩ့ ထိးဆၧၫ့ကၠၭဝ့ၫဒၪနီၪလီၫႉ ဒက်ချ်ဖနံၬထကၩ ကဂၩမွဲဝ့ၫ ဂျရက်မိယက်စ်ဗန်ဗလိယက်  ကွ့ၭထၬ ၥဲၫ့စဎွၩထံၫခးဖးဖီၩ့ဖၧၩ့နီၪ ဆူၫခိၪၥဲၫ့စဎွၩ နရဲစွၩ့ (၁၅၇၂-၁၆၀၅) အထီနီၪ ၦဖျိၩ့ဆၨၩၥံၪအီၪလၧ ခၠ့ၩမဲၫ့လဖၪ ဘၪထိးမၩနၧၩ့မၩစၪ အကၠီၩ့ လီၩ့ထၬဝ့ၫဒၪနီၪလီၫႉ

စၭထၪ့လၧ ဎရံၬအနံၪ့ (၁၇) ယၩဒူၩနီၪ လၧၥဲၫ့ခးၡၩခရၧၫ့နီၪအဖၧၩ့ ၦဖျိၩ့ဆၨၩဖိၪၥံၪလဖၪ အလးဂဲၫန့ထၪ့ထဲၩ့ကဆံၭနီၪလီၫႉ ဎရံၬအနံၪ့ ၁၆၀၀နီၪ ၥဲၫ့ၥံၪလဖၪ ကဂဲၫဒုၭထၪ့ ပယၩ့-တီၫငူၫစဎွၩနီၪ  အီၪဂဲၫဒူၭထၪ့ဝ့ၫဒၪလၧ အနိၪ့လံနိၪ့ မုနုၬ မုထၪ့ လံၩခံၫဒဲ လံၩထံၭ နီၪလီၫႉ ၦလၧဘၪလ့ၩခိၪလ့ၩနါ ၥဲၫ့အၥုၭ ခိၪနါနီၪ မွဲၦဖျိၩ့ဆၨၩအကၠီၩ့ ၥဲၫ့ဖးဖီၩ့ကိၪ့ၥ့ၪလဖၪ နဲၩ့ထၬဝ့ၫဒၪတၡါနီၪလီၫႉ အဝ့ၫနီၪ န့ဘၪ ဆၧနဲၪ့လၩဖၩ့လၧ ၥဲၫ့ၥံၪအီၪနီၪလီၫႉ

ထီးမုဆၫကနံၩယီၩ ၥဲၫ့ခးအဖးဖီၩ့နီၪ ၦဖျိၩ့ဆၨၩၥံၪလဖၪအနိၪ့ အီၪဒၪဆၧဒံၭနီၪလီၫႉ ၦဖျိၩ့ဆၨၩၥံၪ အအီၪလၧ ၥဲၫ့ထံၫခးလဖၪ (၁၉) ယၩနံၪ့ အလးခဲၫ့ဆၧၫ့ထီနီၪ ၥဲၫ့စဎွၩ ထံၫခးယဲဂၩလဂၩမွဲဝ့ၫ ချုလာလောင်ကွန် စဎွၩအထီနီၪ ၥဲၫ့ခးကဒိၪထၪ့ထီၫ့ထၪ့အဂး မၩထၪ့ဝ့ၫအၥိၭ ဖျိၩ့ဆၨၩလဖၪအဆၧကၪဆၧဂဲၩနီၪဆ့ ဂဲၫထိးဆၧၫ့လၫ့ဝ့ၫဒၪနီၪလီၫႉ ၦဖျိၩ့ဆၨၩလဖၪၥံၪနီၪ စၭထၪ့ထိးဆၧၫ့ထၪ့ဝ့ၫလၧ အဝ့ၫၥံၪအထံၫခးဆါဖိၪဂီၩ့ စၭထၪ့ဖီၪ့ထၪ့ဖံၭထၪ့ ဆၧမၩ အလးန့လၧ ၥဲၫ့စဎွၩၥုၭခရၧၫ့အလးအကျဲၩ့နီၪလီၫႉ ဆၧလ့ၩခိၪလ့ၩနါလၧ တဝၫ့လဖၪအနိၫ့နးဆ့ ဒူၭကဲၪၦဖျိၩ့ဆၨၩၥံၪလဖၪ ခိၪနါနီၪလီၫႉ