ၦထၧၫ့ဖုဝဲဖျိၩ့ဆၨၩ ဖျိၩ့ၡၩ့ၥံၪလဖၪ ကိၭလၩ့အၥၭလၧ ပွၩကညီၩ အခီၫပယီၫနီၪမွဲ ၦၡၩနီၪလီၫႉ ၦဖျိၩ့ၡိဖိၪၥံၪအအီၪလၧ ထံၫထၪကျိၩ့လဖၪနီၪ ကိၭလၧ ဖၭထံၭနီၪလီၫႉ ၦဖျိၩ့ၡၩ့ဖၭထံၭၥံၪနီၪ ပကဒၪဘၪအီၪလၧ ဖဒို၊ ပိန်းဇလုတ်၊ ကျောက်တံခါး လးကျဲၩ့လဖၪ ပခိၩခးဒီၪ့အလးခဲၫ့ကကဲၩ့မွဲဝ့ၫ နတလင်း၊ ဇီးကုန်း၊ ပခိၩခိၪလီၩခိၪတဝၫ့လဖၪႇဝံးတခိၩ့ႇ ဒိၩ့ပၥံၫ့ႇ ဟ့ၩၥတၭႇ မၠီၩ့မၠၭႇ မအူၪပ့ၫ မွဲဝ့ၫ ထံၫထၪကျိၩ့လးကျဲၩ့လဖၪႇကီၭကရံၭႇဒီၩနၭခိၪလီၩႇ လဲၫ့ဘွဲၩႇ ဖၫပိၫဝံးဒီၪ့မွဲဝ့ၫ ဘံၩၥၫ့လွ့ၫလးကျဲၩ့လဖၪ ၥဲၫ့ခးႇ မဲနၫ့ဘံၩ ဇ့ၩမဲ မုထၪ့ကကဲၩ့ခီၫလးကျဲၩ့လဖၪဒဲ ထီးထီၩ့စိၩ ရခဲၫ့မုနုၬကကဲၩ့ခီၫနီၪလီၫႉ အထီဘဲၫယီၩ ဖျိၩ့ၡၩ့ဆၧချဲၩ့နီၪ ၦဖျိၩ့ဆၨၩဖိၪၥံၪလဖၪအကျၩ ဆၨၩဖိၪၥံၪချဲၩ့အအၪထုၬ လူဆၧချဲၩ့ကမံၩ့နီၪလီၫႉ
ဖျိၩ့ၡၩ့လူဆၧချဲၩ့နီၪ ပကဒၪဘၪ ဆၧချဲၩ့ထီးအလူၬနီၪ အီၪပထုၬဝ့ၫလၧ လူၥီၫ့ခၪ့ထံၭ (သရသံ) နီၪလီၫႉ ဖျိၩ့ၡၩ့အဆၨၩနီၪ လၧၦဖျိၩ့ဆၨၩထၧၫ့ဖုဝဲလဖၪအကျၩ အီၪဝ့ၫ အအၪထုၬဒဲ အီၪပျံၩပျၩလၩ့ လးကျဲၩ့အလဲးထုၬနီၪလီၫႉ ပခိၩခိၪလီၩ့မုထၪ့ကကဲၩ့ခီၫ ဖျိၩ့ၡၩ့ဘုၭဒၭလဖၪ လူဆၧချဲၩ့အီၪထးဂ့ၩဘၪစဲၪ့လါနၫ့ဂ့ၩ မွဲကွ့ၭလံၬကွ့ၭလဲ လဘၪလၧၩ့ဘၪဖိၬဘိၭ ဖျိၩ့ၡၩ့ဎရံၬဖိၪၥံၪလဖၪနီၪလီၫႉလါနၫ့ ဆၧထၪ့အီၪဎုၬမုၬႇ ဆၧခဲးစူၪအဘိၪ့ႇ ဆၧအၪ့ဘိၪ့အၪ့ဆိၫ ဒဲ ဆၧအၪ့ထုၪ့ဎွံၪ လုၫလါထူၫရူၫလဖၪ အီၪထးဘဲၫဒံၭနီၪလီၫႉ နံၪ့ ၁၈၆၀နီၪ ဖရၫ့စ့ၭမ့ၫဆၫ့ ထီးနဲၪ့ထၬ စ့ၭတီၩ့ဘံၩအထၪ့လဖၪအီၪ တီၫငူၫလးကျဲၩ့လၪဖနီၪ မွဲဖျိၩ့ၡၩ့ၥံၪအီၪအလးနီၪလီၫႉ
ပခိၩခးဒီၪ့လးဝၩ့ဖၭဒိၪ မုထၪ့ကကဲၩ့လးကျဲၩ့မွဲဝ့ၫ ဖဒို၊ ပိန်းဇလုတ်၊ ကျောက်တံခါး လးကျဲၩ့လဖၪနီၪ မွဲဖျိၩ့ၡၩ့ၥံၪအီၪဒဲ အၪဒၪဆၧနီၪ န့ခၠ့ၩဎရံၬဖိၪႇ ကၭၥလံၬဎရံၬဖိၪႇ ဖျိၩ့ဘုၭဒၭဒဲ ဗြဟ္မစိုရ် ဆၧဘိၪ့ဆၧဘၩဖိၪၥံၪနီၪလီၫႉ ချဲၩ့ဖျိၩ့ဆၧချဲၩ့ဂ့ၩဂ့ၩဘၪဘၪ ထီးမုဆၫကနံၩယီၩ နီၪလီၫႉ ဎရံၬဆၧဘိၪ့ဆၧဘၩဖိၪ ဖျိၩ့လဖၪ မၩဖျိၩ့လံၬလဲ ဘၪဂ့ၩဂ့ၩဘၪဘၪလါနၫ့ ခွံၬၡိၬခွံၬ အလုၫလါထူၫရူၫၥံၪ လဖၪနီၪလီၫႉ ဖျိၩ့ဘုၭဒၭၥံၪလဖၪနီၪ မၩလံၬလဲလဘၪဂ့ၩဘၪလါနၫ့ဂ့ၩ ပကဒၪဘၪ လူဆၧချဲၩ့ဒဲ လုၫလါထူၫရူၫလဖၪ အီၪထးဒံၭနီၪလီၫႉ