လၧခဲၫ့ စီၩဘၭအူၩကၠံၩအစွၪနီၪ နံၪ့ ၁၉၅၀ လၩ အီဂုၭ ၁၄ၥၫ့ မုဆၫ ၁နၩရံၩခီၫအခံၫ့နီၪ ဂဲၫန့ဝ့ၫလၧ မီၫလမဲၫ့ဆၧဆၫ ဂံၪ့နီၪလီၫႉ လၧမီၫလမၠဲၫ့ဆၧဆၫဂံၪ့နီၪ ၦဖျိၩ့ခိၪနါဒိၪစီၩဘၭအူၩကၠံၩအစွၪယီၩ ဝံးဖိၪၥံၪလဖၪ ဘၪဒၧၭယိဝ့ၫ ၦၡၩဂဲၫအၪမၬနီၪလီၫႉ ကနံၩနီၪ လဂီၩခီၫနီၪ ပဒိၪပမုၥံၪလနၩ့ ႇ ၦလၧဂဲၫအၪ့န့ဆၧပရၧၫ့လဖၪႇ ထံၫယဲၩ့ခးယဲၩ့ဆၧပရၧၫ့ကိၫ့စၩလဖၪ ဂဲၫယိဝ့ၫလၧ ကဘၩ့ယူၩနီၪလီၫႉ အခံၫ့နီၪ ၦလၧဂဲၫစီၩဘၭအူၩကၠံၩအလးခဲၫ့ၥုၭၥံၪလဖၪ ဖိၭဘိၭ (၄၀) နီၪ ဘၪထဲၩ့ဆူၭခဲၫ့ထဲၩ့အၥၭလၧ လဲၫ့ဘွဲ နီၪလီၫႉ နံၪ့ ၁၉၅၀ လၩ အီဂုၭ ၁၂ၥၫ့နီၪ ကၠဲၬခမံၫခးရ့ၫ ကီၭကရံၭဝံးဒီၪ့ ထီကီၫကိၩတဝၫ့ KNDO အခိၪနါဒိၪနံၫဂၩလဂၩ ၦလၧဘၪအၪ့န့ထၪ့မူၩဒၩလၧ ထံၫထၪကျိၩ့ စီၩစၫ့က့ၩႇ ၥုၭခိၪဒိၪ စဲၩ့ခ့ၫႇ ခ့ၫအၪ့ယူၫ ခိၪနါဒိၪ စီၩဘၭအူၭကၠံၩဒဲ စီၩဘၭအူၩကၠံၩ အၡၩဒူၩ (ကိုယ်ရံတော်)လဂၩ ဘၪဖ့ၪလၫ့လၩ့ခွံၬအၥၭလၧ ဆၨၩအဂးနီၪလီၫႉ လၧခဲၫ့ ဘဲၫဎရံၬဖိၪလဖၪအလုၫအလါအီၪအၥိၭ အၪ့ကံၩ့ဘၩ ဆိၪဖၪ ဖီလံၬဆံၫ့ဎံၪလဖၪဂီၩ့ ဂဲၫထဲၩ့န့ထဲၩ့ဝ့ၫလၧ မီၫလမဲၫ့ဆၧဆၫဂံၪ့နီၪ လယဲၩ့နၭဘၪလၧ မီၫလမၠဲၫ့ ထံၫနဲၩ့ ကၠဲၬခမံၫပၫ့လဲၫ့အခံၫနီၪ ဂဲၫန့ဝ့ၫလၧ ပဒိၪအကဘၩ့ဂီၩ့ စီၩဘၭအူၩကၠံၩအစွၪနီၪ ခွံၬလၩ့ဝ့ၫဒၪလၧ ထံၫကျၩနီၪလီၫႉ
စီၩဘၭအူၩကၠံၩအထံၩၥိၭလဂၩမွဲဝ့ၫ စီၩစၫ့ဖိၩၥ့ၩလီၩထးဝ့ၫ စီၩဘၭအူၩကၠံၩဘၪထိးၥံၫအၥၭအခံၫ့နီၪမွဲ ၦအဖ့ၪလၫ့လၩ့အၥၭ လၧအဝ့ၫအဆၧနဲၩ့အဂး(မိမိယုံကြည်ချက်အတွက် အသက်စွန့်သွားသူ) အကၠီၩ့ ယယူၭယၫ့ပၭကၩနီၪလီၫႉ မွဲဆၧဘဲၫနီၪ ၦဖျိၩ့ခိၪနါဒိၪ စီၩဘၭအူၩကၠံၩ လၧဆၨၩအဂး ဘၪဖ့ၪလၫ့လၩ့ခွံၬအၥၭ ထၧၫ့ဖျိၫ့ယၫ မုနံၩ လၩ အီဂုၭ (၁၂) ၥၫ့ယီၩ ကအီၪက့ၪထၪ့လၧ ၦဖျိၩ့မၫတုရၫမုနံၩအဂး ၦဖျိၩ့ဆၨၩခရၧၫ့ (ခ့ၫအၪ့ယူၫ) အီၪက့ၪၥၭလၩ့ဎိၭနီၪလီၫႉ
ၦလၧဖ့ၪလၫ့ဆၧပရၧၫ့ လၧ ကဖီၪ့ စီၩဘၭအူၩကၠံၩ ဒဲ အခရၧၫ့လဖၪ လၧပဒိၪၥံၪအဂး ဆၧအုၩ့လၩ့ဂုးခၧၫ့ၦဖျိၩ့ဆၨၩလဖၪအဂး န့ဘၪဝ့ၫ ပဒိၪၥံၪဖ့ၪလၫ့အ့ၪခိၪဖၭ လၧအထီနီၪ ထီး (၅၀၀) ဒဲ ပဒိၪအၥုၭၥံၪလၧအဖီၪ့ စီၩဘၭအူၩကၠံၩၥံၪနီၪ အဂး ထီး (၅၀၀) နီၪလီၫႉ မွဲပအဲၪကွံၩယူၭယၪ့ဘၪ ၦဖျိၩ့မၫတုရၫလဂၩ ပဒိၪမၩ့ၡၫလၩ့ဖၩ့ လီၩဝ့ၫဒၪ ဘဲၫၦၡၩၥံၪနီၪ လၨၪခၫ့ဖၬၥနိၫ အီၪအၥိၭ ဆၨၩကိၭဆၨၩဆ့ ၦလၧလဂ့ၩဘၪအဆၨၩ အဖၫ့ခိၪ အီၪဝ့ၫလီၫႉ ဖျိၩ့ၥံၪအ့ၪမွဲဆၨၫနီၪ ဖျိၩ့ၥံၪကဘၪထိးလီၫႉ (လူတိုင်းမှာဖောက်ပြန်တဲ့သူတွေရှိသလို လူမျိုးတိုင်းမှာလည်း သစ္စာဖောက်တွေရှိတယ်။ ကရင်တွေညံ့ရင်တော့ ကရင်တွေခံရမှာပဲ။) နံၪ့ ၁၉၅၈နံၪ့ စောဟန်ဆင်တေဒါ လီၩထး ဖျိၩ့ဒဲ ပယၩ့အဆၧဖံၭၥိၭနီၪ ၁၉၄၉ – ၁၉၅၀ အထီနီၪ ကဲၪထၪ့ ၦဖျိၩ့ဖးဖီၩ့ အခံၭထုၬမုနံၩ (ကရင့်သမိုင်း၏အမှောင်ဆုံးနေ့) နီၪလီၫႉ