ဘၪန့လဲၪခိဆၧၩ့ချံၫ့ဘၪအၪ့လဲၩထၪ့အၥၭ ဘဲၫယီၩၥိၭနီၪ အရ့ၩဒိၪထုၬအကၠီၩ့နီၪ မွဲဝ့ၫ ဂၪ့ခိၪချိၫ့ဂဲၫခိထၪ့အဂဲး နီၪလီၫႉ ဘၪန့လဲၪဂၪ့ခိၪချိၫ့ ဘၪခိထၪ့ဝ့ၫဒၪနီၪစွါဘဲၫ ဆၧဎုထၪ့ဂၩ့ဎွံၫလးႇ မ့ၪဆၫနီၪဘိၭ မွဲ လိးၥွၫထီးႇ ကျဲၩ့တံၭဒဲ စီၩ့အွံၩၥံၪလဖၪနီၪလီၫႉ အထီဘဲၫယီၩ လၧခးပယၩ့ဖၧၩ့ ဆၧမၩၥံၪလဖၪယီၩ မွဲမၩအၪထၪ့ဝ့ၫလီၫႉ လိးၥွၫထီးစဲၭဒူၭလဖၪ ကၥုၪ့ထၪ့ဝ့ၫဒၪအၪမၬလီၫႉ ဆၧယီၩမွဲ ကြၨၭအၪ့ဎၬထၪ့ထဲၩ့ဆွံဆွံယိၬယိၬလီၫႉ ပနဲၩ့ဎီၩ့မွဲဝ့ၫ ခးတရူၭနးဆ့ ၥိၩ့ထၪ့ လိးၥွၫထီးစဲၭဒူၭအၪ့မၬဒဲ မွဲလယိထဲၩ့ဘၪအနဲၩ့ဎီၩ့အကၠီၩ့ အဝ့ၫၥံၪအထံၫခး နဲၩ့ဎီၩ့အဆၧလၩ့အၪ့ယိၫကဲၪထၪ့အၪမၬလီၫႉ

ဆၧဎုထၪ့ ဂၩ့ဎွံၫလးမ့ၪဆၫဂီၩ့ ထုၬထၪ့ စီၩ့အွံၩ လခဲၫကမံၩ့နီၪ ဆၧမၩဆိၫ့ဂီၩ့ ၥံၪ့ကျိၭနီၪလီၫႉ ဆၧမၩဆိၫ့ဂီၩ့ ၥံၪ့ကျိၭအလးနီၪ မွဲခးပယၩ့ယီၩ အနၭထုၬလီၫႉ ဂၪ့ခိၪယီၩ မွဲပၫဝ့ၫဒၪလၧ ဆၧဝံ (၄) အဖၧၩ့ ဆၧမၩဆိၫ့ဂီၩ့ ၥံၪ့ကျိၭအလး အအၧၩ့ထုၬနီၪမွဲဝ့ၫ လနုၬဘၪၥနိၪ အၪ့ဂူၪအၪ့ဆၫဂူၪၥံၪ့နီၪလီၫႉ ခပယၩ့ယီၩ လနုၬဘၪၥနိၫ့ အၪ့ဂူၪအၪ့ဆၫဂူၪၥံၪနီၪ ဂၪ့ခိၪယီၩ အီၪဝ့ၫဒၪလၧ ဆၧဝံ (၅) အဖၧၩ့နီၪလီၫႉ လခဲၫအရ့ၩဒိၪထုၬ ကထုၪ့နီၪ ကြၨၭပထံၭလၩ့ထၬလၧ ပခိနုၬဖၧၩ့ကိၭဂၩ လိၫဝ့ၫလီၫႉ

အီၪလၧ ခးအ့ၫဂလၫ့ ဂၪ့ခိၪအခရၧၫ့ဒိၪကခရၧၫ့မွဲဝ့ၫ ဟားတလီစင်တာ နီၪ အၪ့ဎၬထယၬထၬဝ့ၫ ပခးပယၩ့ယီၩ ၥဲၭကရ့ၭ ၂၁၀၀ခိၭနီၪ ဆၧခိကဂဲၫဆီၪ့ထၪ့ ယဲ ဒံၫဂရံၫစံၫတံၫဂရံၭအကၠီၩ့ လီၩ့ထၬဝ့ၫဒၪလီၫႉ လၩ့ၥၭမဲၪဝ့ၫဒၪအၪမၬလီၫႉ ဆၧခိအ့ၪမွဲဂဲၫဆီၪ့ထၪ့ဘဲၫယီၩၥိၭစွါဘဲၫ မံၫအၪ့ၡိၬႇ ဆၧခိနၭလၨၪႇ ဆၧဆၧၩ့လၩ့ၡၩႇ ဆၧၥုၪ့ဆၧဖျါကလၩ့ၡၩႇ ပၫ့လဲၫထံၫကဂဲၫထၪ့ ဒဲ ဒံၪၥံၪယၪၥံၪကလၩ့ၡၩအကၠီၩ့ ၦခမျၧးလဖၪ ကဘၪဒၪဎီၩ့ဆၧၫ့ယၫ ဆၧကၪဆၧဂဲၩနီၪလီၫႉ

လၧခဲၫထုၬ ကထုၪနီၪဘိၭ လၧပခးပယၩ့ဖၧၩ့ အရ့ၩဒိၪဝ့ၫဒၪ ဘၪထွ့ၫလၧ ဆၧဆၧၩ့ဒဲ လံၩမုလဖုၬကိၪ့ၥ့ၪ အနိၪ့ ဆၨၩၥၫ့ဘၪ့လဖၪလိၫဝ့ၫဒၪအၪမၬနီၪလီၫႉ