ခးပယၩ့ၥၫ့ခိၪဒိၪ ဘာဆီလျိုအားသိုက် ဆၫ့ထွ့ၫဘၪ ၦဆူနဲၩဖိၪၥံၪ ဘဲၫနးၥၭဂဲးဘၭ ကန့ အဂး ကြၨၭဖီကၠၭလံၬဆံၫ့ဎံၪအဂဲးနီၪလီၫႉ လၩစဲၭတံၫ့ဘၧၫ ၂၈ၥၫ့ ယ့ၫၡူၭအၥၭဆံၫ့ဎံၪဆၧအီၪကီၪ့ မှော်ဘီဝံး ၦၡၩမၩလၩမၩဖၩ့ လံၬဆံၫ့ဎံၪဘိၪ့မုနံၩဖၧၩ့ အဝ့ၫယီၩ ဆၫ့ထွ့ၫဘၪ ၦဆူနဲၩဖိၪၥံၪနီၪလီၫႉ

“ဘဲၫနနးၥၭဂဲးဘၭကန့အဂးနီၪ ဖီလံၬဆံၫ့ဎံၪလါဆံၭ” အဂဲး လံၬဆံၫ့ဎံၪၦမၩဆၧဖိၪခရၧၫ့ ခိၪနါဒိၪလဂၩမွဲဝ့ၫ ၥၫ့ခိၪဒိၪဘာဆီလျိုနီၪ စံၭဝ့ၫဘဲၫနီၪလီၫႉ

လကၭဘၪ လံၬဆံၫ့ဎံၫနီၪ ခိၭနၪလၧနါႇ ဖီလၧပမ့ၬၥၪႇ ဖီလၧဆၧထိၪတွၭအၪ့ဎၬ ဒဲ ဖီလၧ ၥုၪ့ၥၭအဂးဆ့ အဝ့ၫယီၩ ဖံၭၥိၭဘၪ ၦဆူနဲၩဖိၪၥံၪနီၪလီၫႉ

တောင်ကြီးကၭၥလံၬဆၧအီၪကီၪ့ ၥၫ့ခိၪဒိၪနးဆ့ “လံၬဆံၫ့ဎံၪနီၪ မၩဂုးခၧၫ့ပဆၧဆူနဲၩန့ အဂဲးႇ ဘျၩ့ခွံၬအ့ၪပၧၩ ပၥုၪ့ၥၭလၩ့ဆါလဖၪန့အဂဲး|” စံၭဝ့ၫဒၪ လၧလၩ့ထံးလၩ့ဆ့ၭဖၧၩ့နီၪလီၫႉ

ဝံးတခိၩ့ဆၧအီၪကီၪ့ ၥၫ့ခိၪဒိၪ ဖရန်စစ် သန်းထွန်း ဆ့ “ကဆါယွၩနီၪ ချဲၩ့ဒုၪ့ပၧၩလၧ အ ဆၧၥၭထိၬပရၧၫ့ဖၧၩ့အဂဲး” စံၭဝ့ၫဒၪလီၫႉ

လံၬဆံၫ့ဎံၪ ကီၫမၡ့ၫခရၧၫ့ခိၪနါလဂၩမွဲဝ့ၫ မော်လမြိုင်ဆၧအီၪကီၪ့ ၥၫ့ခိၪဒိၪမောရစ်ညွန့် ဝေ လီၩလၩ့လါလၩ့ထဲၩ့ “လံၬဆံၫ့ဎံၪဖၧၩ့ ၥံၪ့ထံၭလၧအဖ့ၪလၫ့ဆၧၥၭမၧၫ့” အဂဲးနီၪလီၫႉ

“လၧလံၬလးလံၩဖၧၩ့ ၥံၪ့ထံၭလၧအဖ့ၪလၫ့ဆၧၥၭမၧၫ့ဒဲ ၥံၪ့ထံၭလၧအအၪ့နၩ့ဘဲၩ့ဖၭ ဆၧအဂ့ၩ ဒဲဆၧအအၧၩ့ ဘဲၫနီၪ အီၪဝ့ၫဒၪ နံၫထံၭနီၪလီၫႉ ပကဲၪၦၡၩလဖၪယီၩ ဘဲၫပဘၪပၥၭအၥိၭ မွဲပရွံ ထၪ့န့နီၪလီၫႉ ၥံၪ့ထံၭလၧအဖ့ၪလၫ့ဆၧၥၭမၧၫ့အဂဲးနီၪ ၦၡၩလဖၪယီၩ လလီးလီၩဘၪဝ့ၫလီၫ” အဂဲး ၥၫ့ခိၪဒိၪယီၩ စံၭဝ့ၫဘဲၫနီၪလီၫႉ

ၦလၧအလ့ၩခိၪလ့ၩနါဆၧထံၪလၩ့ဒီၪလၩ့ယီၩနီၪ မွဲလၧလံၬဆံၫ့ဎံၪကီၫမၡ့ၫ National Director Fr. George ရွှေထွန်း ဒဲ ဝံးတခိၩ့ဆၧအီၪကီၪ့ လံၬဆံၫ့ဎံၪခရၧၫ့ၦမူၩဒၩအီၪ Fr. Peter Tun Tunဒဲ အခရၧၫ့ဖိၪၥံၪနီၪလီၫႉ

 ဆၧထံၪလၩ့ဒီၪလၩ့အယီၩနီၪ ဝံးတခိၩ့ လံၬဆံၫ့ဎံၪကီၫမၡ့ၫအဂး မွဲ၁၄ဘျၩ့လဘျၩ့ဂီၩ့ မွဲဒံၭ လၧမၩလၩမၩဖၩ့ထဲၩ့ဘၪ လံၬဆံၫ့ဎံၪၦကိၪ့ၥ့ၪဖိၪ ၦဆံၫ့ဎံၪစိန်ဂျေရုမ်း အဘိၪ့မုနံၩဒံၭနီၪလီၫႉ

ၦဆံၫ့ဎံၪစိန်ဂျေရုမ်းနီၪ ကွ့ၭထၪ့ခီၫ့ထဲၩ့ လံၬဆံၫ့ဎံၪ ဂရိအလၨနီၪ ဘဲၫလာတင်းအလၨ အၥိၭနီၪလီၫႉ

ဆၧထံၪလၩ့ဒီၪလၩ့ယီၩစၭထၪ့ဝ့ၫဒၪလၧ  Fr. George Shwe Htun လ့ၩခိၪလ့ၩနါ ထံၭလၫ့ လံၬဆံၪ့ဎံၪ လၧလးဆီၩ့ဆီအဖၫ့ခိၪနီၪလီၫႉ

ၥၫ့မုၥၫ့ခၫလဖၪႇ မံၭထၭမုၪႇခွၫလဖၪႇ ဆၧအီၪကီၪ့ဆရၫႇမုၪလဖၪႇ ဆၧမၩလိၪဖိၪလၧ ကမိကဲၪထၪ့ၥၫ့မုၥၫ့ခၫလဖၪႇ လၧဆၧအီၪကီၪ့ဂူၫဂၩဖၧၩ့ လံၬဆံၫ့ဎံၪကီၫမၡ့ၫခရၧၫ့ဖိၪလဖၪ ခိၪနါ လဖၪဒဲ ဆၧဘိၪ့ဆၧဘၩဖိၪၥံၪ ဂဲၫထၪ့ဝ့ၫဒၪနီၪလီၫႉ

လၧလံၬဆံၫ့ဎံၪခရၧၫ့ဖၧၩ့ ဂဲၫထဲၩ့ဂဲၩဝၭထၬဝ့ၫ ထၪ့ဘၭ၁၀နံၪ့ဒဲ အဘျဲၪၦလဖၪနီၪ ဖ့ၪဆၧၫ့ထဲၩ့ ဝ့ၫ ဆၧလၩဆၧဖၩ့လံၬထီးနဲၪ့နီၪလီၫႉ

လၩစဲၭတံၫ့ဘၧၫ၂၈ၥၫ့ လဂီၩ၁၁နၩရံၫခီၫအခံၫ့ လုထၪ့လၩ့ဎိၭ မံဆၩဆၧလုထၪ့ဂီၩ့ အီၪပထုၬ ခွံၬထဲၩ့ လံၬဆံၪ့ဎံၪဘိၪ့မုနံၩ ဆၧထံၪလၩ့ဒီၪလၩ့အဂဲး ဆၧပရၧၫ့ယီၩ ပန့ထၬဘၪလၧ RVA Sagaw Karen Serviceအဖၧၩ့နီၪလီၫႉ

နးအဲၪဖီၫဘွၩ