အထီၫအီၪဝ့ၫဒၪ ကံၫလိၫမံၫတၫ ၄၈၀၀ မွဲဝ့ၫ မဲခီၫဘံၩနီၪ ခးအ့ၩၡၩ မုထၪ့လံၩထံၭကကဲၩ့ခီၫ ဆ့ၭလၩ့ယွၩလၧ ထံၫခး ၆ ခးနီၪလီၫႉ မဲခီၫဘံၩယီၩ ဆ့ၭလၩ့ယွၩဝ့ၫဒၪ ထံၫခး (၆) ခးနီၪ မွဲဝ့ၫ တရုတ်၊ မြန်မာ၊ လာအို၊ ထိုင်း၊ ကမ္ဘောဒီးယား၊ ဗီယက်နမ် ထံၫခးၥံၪနီၪလီၫႉ ဘံၩယီၩ မွဲလးကျဲၩ့ယီၩအဖၧၩ့ အထီၫထုၬ ဘံၩလဘီၩ့ဂီၩ့ အဝ့ၫအထံၫခံနီၪ အီၪလုၭဘံၭဝ့ၫဒၪ ခီၫလၧ တံဘဲၭလးကျဲၩ့ ထီးထီၩ့ ဘံၫယဲနၫ့ထံၫချိၬ လးကျဲၩ့ၥံၪနီၪလီၫႉ ၦခမျၧးအီၪဝ့ၫဖိၭဘိၭ အခွး (၆၀) နီၪ အီၪဒူၭနဲၩ့အၥၭလၧ မဲခီၫဘံၩ ဆၧအၪ့ဆၧအီၩ ထံၫဒဲ ဆၧၥိၪ့ထုၬၥိၪ့လၩ့ ဆၧလဖၪအဂး ၥိၩ့ထၪ့ဘံၩယီၩနီၪလီၫႉ လကၭဒံၭဘၪ အီၪဒူၭနဲၩ့ထၪ့အၥၭ လၧဘံၩနီၪဂီၩ့ ကိၭနံၩဂၪဂီၩ့ မၩထၪ့ကၠၭ ဆၧအၪ့လုၥၭမၧၫ့လဖၪအဂးဒဲ ဆၧဆၧးဎံၫဆၧးလၩ အနိၫ့နးဆၧ အရ့ၩဒိၪဝ့ၫဒၪ ဘံၩနီၪလီၫႉ ထီးနီၪ မဲခီၫဘံၩနီၪ ဂၪ့ခိၪချိၫ့ယီၩ ယၪအီၪဝ့ၫဒၪ အမံၩ့မံၩ့တၭ မၩခိးတၩထၪ့ ၦလၧလီၩ့ဎွါအၪ့ ဒံၪၥံၪယၪၥံၪနီၪလီၫႉ အီၪဝ့ၫလၧ ခးဘရၫဇံၩ အမ့ၫဇိၫ့ဘံၩဂီၩ့နီၪ မဲခီၫဘံၩနီၪ မွဲယၪအဆၨၩၥံၪ အီၪအအၪထုၬ ဘံၩကဘီၩ့နီၪလီၫႉ
လၧခးပယၩ့ၥဲၪ့ဆၨၩခးဒီၪ့ဒဲ လၫအိၫထံၫခးအကျၩ မဲခီၫဘံၩနီၪမွဲဝ့ၫအဆၧၫ့ ဆ့ၭလၩ့ယွၩဝ့ၫဒၪအထီၫအီၪဝ့ၫ ကံၫလိၫမံၫတၫ ၂၃၄ ကံၫလိၫမံၫတၫနီၪလီၫႉ လၧမဲခီၫဘံၩဆ့ၭယွၩလၩ့ ခးပယၩ့ခိၪလီၩ့ထိၩ့ချိၬဖိၪ ဆၨၩဆၬဖိၪၥံၪ အီၪဒူၭနဲၩ့အၥၭ ဖိၬဘိၭ ၂၂၀၀၀နီၪလီၫႉ ဆၧအလးၥံၪလဖၪယီၩ မွဲအီၪဝ့ၫဒၪယဲၩ့ဂီၩ့ အခၫဆၨၩဆၬႇ ၥဲၪ့ႇ လၩဟူၫႇ လွဲၪလၭႇ တရူၭ ဒဲ အ့ၩဆၨၩဆၬဖိၪၥံၪလဖၪ အီၪဝ့ၫဒၪနီၪလီၫႉ မဲခီၫဘံၩနီၪ လၧခးအ့ၩအဖၧၩ့ယီၩ ဆ့ၭလၩ့ယွၩဝ့ၫဒၪ ဘံၩဖၭဒိၪ ကဘီၩ့နီၪလီၫႉ မဲခီၫဘံၩနီၪ ဖံၬဒၩလးဒဲ ထံၫထၫကျိၩ့လးကျဲၩ့လဖၪ ထံၫဎိၩလၩ့ၥ့ၪနီၪလီၫႉ မဲခီၫဘံၩအကၠီၩ့ ကၫ့ဘီၩဒံၫယၩထံၫခးဒဲ ဘံၫယဲနၫ့ထံၫခးၥံၪ ဖံၬယၪထံၫ့ဂ့ၩနီၪလီၫႉ