နံၪ့၂၀၂၄နံၪ့ လၩစဲၭတံၫ့ဘၧၫ ၂၇ၥၫ့အဂၫလၩ့ ၄နၩရံၫခီၫအခံၫ့နီၪ အ့ၫယၫဝတံၫခးဒီၪ့ ဒိၩ့ပၥံၫ့ဝံးဖၧၩ့ၦဆူနဲၩဎြံၬ ဆၧဘိၪ့ဆၧဘၩထီးလူၬလဖၪနီၪ စူၭကီၪ့လၩ့ဎိၭလၧ ဒိၩ့ပၥံၫ့ကၭၥလံၬ ဆၧအီၪကီၪ့ စံၫ့ပံတၧၫ့ကၥံၫဒရဲၫၥရိၬဖၧၩ့ဂီၩ့ စူၭကီၪ့ဘၩဎိၭလၩ့ယွၩဒဲ အၪ့ကံၩ့ဘၩဆိၪဖၪဎိၭလၩ့ၡီၩ့ ခးပယၩ့ဖၧၩ့ ဘဲၫဆၧဎူၫဆၧဎၩ့ ဒဲ ဆၧဘၪလိၬဎွ့ၪဎီၩ့ကအီၪထၪ့အဂးနီၪလီၫႉ

အဆိၪထုၬနီၪ ကၭၥလံၬဆၧအီၪကီၪ့ မွန်ဆီညော် ပီအူးဝင်းသန်း  လီၩလၩ့လါလၩ့ဘၪ ဆၧအၪ့ဂၬထိးဆၧၫ့ဆၧချဲၩ့လဖၪဒဲ လီၩပျၩ့ဖ့ၪနဲၪထဲၩ့ဘၪ ၦဎြံၬဖိၪၥံၪစူၭကီၪ့ဘၩဎိၭလၩ့ယွၩဆၧထံၪ လၩ့ဒီၪလၩ့အဂဲးနီၪလီၫႉ ဂီၩ့နီၪအဝ့ၫယီၩဆုးထဲၩ့စံၭဝ့ၫဒၪ “ဆၧၫ့ထီဘဲၫယီၩနီၪ ပထံၪခးဖၧၩ့ ပဘၪဒၪ ဆၧၫ့ယၫ လၧဆၧအၪ့ထၩလဖၪအၪမၬလါနၫ့ ကဆါယွၩနီၪ ကနံၩကကၠၪကိ မွဲကဖ့ၪလၫ့ထဲၩ့ပၧၩ ဆၧမုၬဆၧၡူၪဒဲ ဆၧဎူၫဆၧဎၩ့နီၪ ပဆူနဲၩဝ့ၫဒၪလီၫႉ”

ဂီၩ့နီၪ ကၭၥလံၬၥၫ့ခၫ Fr.Jimmy ဆုးထဲၩ့စံၭဘၪဝ့ၫ “ၦဎြံၬဖိၪၥံၪလဖၪဆၧဎူၫဆၧဎၩ့က အီၪထၪ့အဂးဒဲ ဆၧဘၪလိၬဎွ့ၪဎီၩ့ကအီၪထၪ့အဂးအၪ့ကံၩ့ဘၩဆိၪဖၪၡီၩ့ ဆၧထံၪလၩ့ဒီၪလၩ့ယီၩ အဖၧၩ့ ၦအဂဲၫထၪ့ဝ့ၫဒၪကိၭဂၩဒ့ၭနီၪ ယအၪ့ဂၬထိးဆၧၫ့ဘၪလီၫႉ လချုၭလခီၫဘၪအဖၧၩ့ ခးပယၩ့ ဆၧဎူၫဆၧဎၩ့ ကအီၪထၪ့အဂးဒဲ ၦဎြံၬဖိၪၥံၪအကျၩ ဆၧဎူၫဆၧဎၩ့ဒဲဆၧဘၪလိၬဎွ့ၪဎီၩ့ ကအီၪထၪ့ အဂး နၥံၪဂဲၫစူၭကီၪ့ဎိၭလၩ့ ဂီၩ့ဂဲၫဘိၪ့ထၪ့ဘၩထၪ့ၡီၩ့ယွၩနီၪဆ့ ယအီၪက့ၪဖိၫလိၫဘၪနၥံၪအၪမၬ လီၫႉ  “ဘဲၫစမၭၥုၫကွ့ၭထၬဝ့ၫ18:20ဖၧၩ့ အဂဲးဘဲၫယီၩ ထီးဒၪအလး လၧနံၫဂၩၥၧၫ့ဂၩ အီၪကိၩ့အီၪ ကီၪ့လၧယမံၩ့အကၠီၩ့နီၪ ယအီၪယဝ့ၫလၧအကျၩထီးနီၪလီၫႉ” အၥိၭ ပဝ့ၫၥံၪလဖၪ ပဂဲၫစူၭကီၪ့ လၧယီၩအကၠီၩ့ ယွၩကအီၪလၧပၧၩအဂဲးနီၪ ယနဲၩတၡါဂီၩ့   ဘဲၫၥိၭခးပယၩ့ဆၧမုၬဆၧၡူၪကအီၪ ထၪ့အဂးနီၪ ပကအၪ့ကံၩ့ဘၩဆိၪဖၪဎိၭလၩ့ လၧယွၩအီၪကၠၧၫ့ကၠၧၫ့လါဆံၭနီၪ ယကိၭဖံၭၥိၭဘၪဒဲ ဆၧအၪ့ဂၬထိးဆၧၫ့ဘၪနၥံၪဘဲၫယီၩအၥိၭနီၪလီၫႉ”

  လကၭဘၪ ပယၩ့ဘၧၩ့ထံၫဆၧအီၪကီၪ့ခိၪနါ Rev.ဦးထွန်းလှ ဆုးထဲၩ့လီၩလၩ့လါလၩ့ ဘၪဝ့ၫ “မုဆၫကနံၩယီၩ လၧပခးပယၩ့ဖၧၩ့ ဆၧဒုၭဆၧခၭကဲၪထၪ့ ထံၫဎိၩ့လၩ့နီၪ့ဎိၩ့လၩ့ဒဲ ဖံၭလၩ့ဎံ လဖၪ ကဲၪထၪ့ဝ့ၫဒၪလၧအလးလနၩ့နၩ့နီၪလီၫႉ လါနၫ့ ပအ့ၫယၫဝတံၫခးဒီၪ့ယီၩနီၪဘိၭ ထီးမုဆၫ ကနံၩယီၩ ပဘၪထိးဆၧလဖၪနီၪဒံၭအ့ၬႉ ပယိထၪ့ဆၧပရၧၫ့အခၫ ပဒၪဘၪကၠၧၩ့ ဆၧပရၧၫ့အအုၭ လဖၪနီၪလီၫႉ ဆၧပရၧၫ့အမုၬအီၪနးမံၩ့အ့ၬႉ ၦၡၩဘၪၥံၫဘၪဆၫ ဘၪလၩ့အုၭလၩ့ယွၩ ဘၪၥံၫဂီၩ့ ၥံၫစၪဘဲၫနီၪ အီၪဝ့ၫဒၪအၪမၬလီၫႉ ၦလၧအဘၪဒၪဆၧၫ့ယၫ ဆၧနိၫ့ဆၧနၬလဖၪအကျၩ ယၥ့ၪယၫ ဒၪမ့ၬထံၩၥိၭလဖၪ ပၫထဲးအကၠီၩ့ ယကိၭချဲၩ့ဒုၪ့စိၩအဝ့ၫၥံၪ ယအၪ့စၪ့အဝ့ၫၥံၪအဂဲးကကၠၪ အဝ့ၫၥံၪ ယီၩ စံၭထဲၩ့ယၧၩ ပၥံၫဒံၭအ့ၬဆရၫဧ့ ဆၫအၪ့ဆၫအီၩၥံၪအနံၪ့ထၪ့အၪမၬလ့ၬ ဆၫ့ဒံၪကဖျိၪ့ကထီၫ့ ဘျဲၪ ဘၪဘီၪ့ခိၪကဖျိၪ့၁၅၀၀၀ဆရၫဧ့ႉ နကိၭချဲၩ့ဒုၪ့စိၩပၧၩ နအၪ့စၪ့စိၩပၧၩပဂဲးပဖးအကၠီၩ့ ပစံၭခိး စံၭတၩနၧၩအၪမၬလ့ၬ အၪ့ကံၩ့ဘၩဆိၪဖၪအ့ၪပၧၩ ပဂးလူၬဆရၫဧ့ႉ အဝ့ၫၥံၪယီၩ စံၭထဲၩ့ယၧၩလၧ ၥုၪ့အုၭၥၭအုၭအဖၧၩ့ဘဲၫယီၩလီၫႉ ဆၧနီၪအကၠီၩ့ ပထံၭၥိၭလၧအဘၪဒၪဆၧၫ့ယၫ ဆၧကၪဆၧဂဲၩ ဆၧနိၫ့ဆၧနၬလဖၪအဂး မွဲပကဘၪဖ့ၪဂဲးဖ့ၪဘၭအဝ့ၫၥံၪ မွဲပကဘၪအၪ့ကံၩ့ဘၩဆိၪဖ့ၪအ့ၪအဝ့ၫ ၥံၪအဂးနီၪလီၫႉ ပၧၩဝ့ၫ ဘဲၫအဝ့ၫၥံၪအၥိၭ ပဘၪဒၪဆၧၫ့ယၫဒံၭအ့ၬႉ ပဘၪစဲၪ့မံၩ့ဂၭဖျိၭဒံၭအ့ၬ ပၥၭဘၪၥံၫဒံၭအ့ၬ ပနးခီၫ့မိၡါ ပစူၪပခၪ့ဘၪထ့ၬဒံၭအ့ၬနီၪ ဆၧအဂဲးအီၪလီၫႉ အလးကနၩ့နၩ့ ပယိ ထၪ့အခၫ မွဲလၩ့ၥၭအုၭဝ့ၫဒၪအၪမၬလီၫႉ ဘဲၫယီၩပဂဲၫစူၭကီၪ့လၩ့ၥၭနီၪ မွဲလၧဆၧဎူၫဆၧဎၩ့ကအီၪ ထၪ့အဂးဒဲ ၦဎြံၬဖိၪၥံၪကအီၪယံၩအီၪၡီၩ့အဂး ပဂဲၫအၪ့ကံၩ့ဘၩဆိၪဖၪလၧယွၩအီၪလီၫႉ ဘဲၫဆၧဎူၫ ဆၧဎၩ့ကအီၪထၪ့အဂးနီၪ ပကိၭဂၩဒ့ၭအၥၭဖၧၩ့ အဆိၪထုၬပကဘၪ ၥုၪ့လၩ့ထၬ ဆၧဎူၫဆၧဎၩ့အဂဲး ပမွန်ဆီညော်ဝင်းသန်းစံၭဝ့ၫဆ့လီၫႉ ဆၧဘၩဆိၪဖၪအီၪဂဲၫကဲၪထၪ့လၧ ဆၧအဂဲးကမံၩ့မံၩ့ အလး ခဲၫ့နီၪလီၫႉ ဘဲၫယီၩပခးပယၩ့ယီၩ ဆၧဎူၫဆၧဎၩ့အီၪအ့ၬ ဆၧဒုၭဆၧခၭကဲၪထၪ့အကၠီၩ့ ပဝ့ၫၥံၪလဖၪ ပဘၪအၪ့ကံၩ့ဘၩဆိၪဖၪ လၧယွၩအီၪ ဘဲၫပထံၫခးယီၩ ဆၧဎူၫဆၧဎၩ့ကအီၪထၪ့ထဲၩ့အဂးနီၪလီၫႉ ဆၧနီၪအကၠီၩ့ ဆၧအၪ့ကံၩ့ဘၩဆိၪဖၪနီၪ ပခွံၬၡိၬထၬန့အ့ၬႉ ပကဘၪအၪ့ကံၩ့ဘၩဆိၪဖၪ ကိနံၩဂၫဂီၩ နီၪလီၫႉ ပအၪ့ကံၩ့ဘၩဆိၪဖၪဆၧအကၠီၩ့ ကဆါယွၩကဖျါခွံၬပၧၩလီၫႉ ကဆါယွၩ ကဖ့ၪလၫ့ထဲၩ့ပၧၩ ဆၧဎူၫဆၧဎၩ့လီၫႉ ထံၫခးအထၧးအလၧးအဖၫ့ခိၪ ထီးစီၪဘၪမၪဘၪယွၩလဂ့ၩ ဆၧဆူနဲၩဂၭဂီၩ့ခွံၬ လဂ့ၩႉ အကၧၩ့ဒိၪထုၬနီၪ ပကဘၪအၪ့ကံၩ့ဘၩဆိၪဖၪအ့ၪ ပထၧၫ့ဖုထၧၫ့ဝဲၥံၪအဂးလီၫႉ” အဂဲး Rev.ဦးထွန်းလှယီၩ လီၩလၩ့လါ လၩ့ဝ့ၫဘဲၫယီၩအၥိၭနီၪလီၫႉ

လၧဆၧထံၪလၩ့ဒီၪလၩ့ယီၩအဖၧၩ့ ကၭၥလံၬဆၧဘိၪ့ဆၧဘၩဖိၪႇ ဘၧၩ့ထံၫပယၩ့ဆၧဘိၪ့ ဆၧ ဘၩဖိၪႇ ဘၧၩ့ထံၫဖျိၩ့ၡိဆၧဘိၪ့ဆၧဘၩဖိၪႇ ဘၧၩ့ထံၫဖျိၩ့ၡၩ့ဆၧဘိၪ့ဆၧဘၩဖိၪႇ အင်္ဂလီကန် ဆၧဘိၪ့ ဆၧဘၩဖိၪဒဲ ဘၧၩ့ထံၫဆၧဘိၪ့ဆၧဘၩဂူၫဂၩလဖၪ ဂဲၫထၪ့ဝ့ၫဆ့နီၪလီၫႉ

လၧၦဎြံၬဖိၪၥံၪစူၭကီၪ့ဘၩဎိၭလၩ့ယွၩဆၧထံၪလၩ့ဒီၪလၩ့ ထၧၫ့နံၪ့ယၫအဖၧၩ့ န့ဝ့ၫဒၪဆၧမၩ ဘိၪ့အကုၬ၁၀ဘျံၪနီၪ ကမၩဘိၪ့ဝ့ၫဒၪလၧ ထံၫဎိၩလၩ့အလးလဖၪအဂဲး ပန့ဘၪဆၧပရၧၫ့ဘဲၫယီၩ အၥိၭနီၪလီၫႉ

နးအဲၪဖီၫဘွၩ