လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦကၧၩ့ထၪ့ ဆိၬၥၫထနၫ ဖိၪဒံၩဖိၪၥၪခရၧၫ့ ၥၫ့ခိၬ Charles De Forbin Janson အဂဲးအကၠီၩ့နီၪလီၫႉ Charles ယီၩ အီၪဖျဲၪလၧ နံၪ့ (၁၇၈၅) နံၪ့ လၧဝံး Paris နီၪလီၫႉ အမိမိဖါဖါနီၪ မွဲဝ့ၫဒၪ မၩၥုၭဆၧမၩနီၪလီၫႉ လၩ့မၬယံၬ လံနံၪ့ဂီၩ ပၠ့ၫၥ့ၭ ဆၧပိၩ့ထၪ့အခံၫ့နီၪ အဝ့ၫၥံၪအဂံၪ့ဒီၪ့ယီၩ ၦၡၩနၫ့စဲၪ့ထၪ့ခွံၬလၧ ခးချိၫ့ Germany နီၪလီၫႉ ဆၧအလးနီၪ အဝ့ၫၥံၪဘၪဒၪ ဆၧကၪဆၧဂဲၩႇ ဆၧမၩနၧၩ့မၩစၪ အၪမၬဒ့ၭနီၪလီၫႉ

လၧခဲၫ့နီၪႇ Charles ယီၩ တလီၩ့လၫ့အခံၫ့နီၪ ၦထီၫ့ဖိၪၥံၪႇ ဆၧဆၫဂံၪ့ဖၧၩ့ ၦၡၪ့ဖိၪၥံၪ ကမၩဆၧၩ့အ့ၪဝ့ၫအဂး လ့ၩနုၬလၩ့လၧ ဂူၫဂၩအဂး ခရၧၫ့ဖၧၩ့နီၪလီၫႉ လကၭဒ့ၭဘၪႇ Charles ယီၩ Napoleon ထံၫဂဲးခးဂဲး ခီၩ့စၧၫ့ဖၧၩ့နီၪ န့ထၪ့ဘၪ လးလၩကမံၩ့နီၪလီၫႉ လါနၫ့ႇ အဝ့ၫယီၩ နါဂၧၫ့ကဆါယွၩကိၭအဝ့ၫနီၪအကၠီၩ့ ထိးဆိၪခွံၬ လးလၩထီးအလူၬနီၪလီၫႉ Charles ယီၩ နံၪ့ (၁၈၁၁) နံၪ့နီၪ ကဲၪထၪ့ၥၫ့ခၫ ကပၩဂီၩ့ ကၧၩ့ထၪ့ ဎရံၬ ဖိၪဒံၩဖိၪၥၪၥံၪ အဖုၫနီၪလီၫႉ လကၭဒ့ၭဘၪႇ အဝ့ၫယီၩ ကဲၪထၪ့ၥၫ့ခိၬ ကပၩနီၪလီၫႉ ၥၫ့ခိၬ ယီၩ ဂဲၫထဲၩ့ထီၩ့လၧ ခးပၠ့ၫၥ့ၭအခံၫ့နီၪ ဒၪဘၪဖိၪဒံၩ့ဖိၪၥၪၥံၪ ဒိၭန့ဘၪ ဆၧၥူၪဝၭစကြမၫ့တူၩအ့ၬဂီၩ့ ဘၪထိးခွံၬၡိၭၥၭႇ ဘၪထိးမၩနၧၩ့မၩစၪၥၭ အၪမၬဒ့ၭနီၪအကၠီၩ့  အၥၭခံဖၧၩ့ ဘၪထံၭဘၪဆၫ ကဲၪထၪ့အၪမၬဒ့ၭနီၪလီၫႉ

ဆၧနီၪအကၠီၩ့ႇ ဘၪထွ့ၫလၧ ဆၧကဲၪထၪ့အဂဲးယီၩ ကကၩ့ကၩလၩ့ဝ့ၫအဂး လ့ၩဒၪလၧ ၦယိၩယိၩဖိၪ  Pauline Jaricot နီၪလီၫႉ ၥၫ့ခိၬယီၩ ကမၩဖျီၪထၪ့ ဆၧပရၧၫ့အရ့ၩဒိၪဒဲ အဝ့ၫအဆၧမၩအဂး ကၥံၫထီ လၩလံဘံၪ့နီၪ ဘိၭဘၪၥ့ၪယၫ ဖိၪၥၪဆံၫ့ဎံၪခရၧၫ့ ဆၧကွ့ၭနဲၪ့ နီၪလီၫႉ ၥၫ့ခိၬ De Forbin Janson ယီၩ နံၪ့ (၁၈၄၄) နံၪ့   နီၪၥံၫဖီၩ့ခွံၬဝ့ၫဒၪနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ Charles De Forbin Janson အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ