ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ ထီၩ့လၧ နးမံၩ့ဖီၫဝီၩလဂၩ အီၪခိၬယိလါအမိမိ ကဂဲၫထဲၩ့နီၪလီၫႉ

          နးမံၩ့ဖီၫဝီၩလဂၩ အၪ့စၪ့အဖါဖါ ကဘျၩ့ဂီၩ့ကဘျၩ့အခၫ အဖါဖါစံၭဆၧၫ့ထဲၩ့ ဖိၪမုၪဧ့ ဖါဖါလီၩနၧၩယီၩ ခိၭနၪထံၪထံၪအီႉ မိမိဒဲ ဖါဖါ အၪ့ခွ့ၫအထီ ယၪန့ကဘံၪ့ အနီၪ နမိမိထံၭလၩ့လၧ နဲၩ့ဖၧၩ့ဂီၩ့ စံၭဆၧ လၧၫ့အၪ့ ယဖိၪမုၪနးမံၩ့ဖီၫဝီၩယူၭဂီၩ့ ကိၭဂဲၫထဲၩ့ဖါလၧ ဂံၪ့လီၫႉ အဝ့ၫ ကိၭဂဲၫထဲၩ့ ဖါလၧဂံၪ့ ခိၪမၪခိၪမၪအခၫ ဖါဖါ ၥၭထၪ့ကထံၪလီၫႉ အၡါမၪနီၪ ခဲၫ့ကံၭဝ့ၫ ဖိၪမုၪကၥၭဝံနူနီၪ ဖါဖါထုၪ့အၥၭအ့ၬ ဖါဖါစီၪမွဲ လီၩချဲၩ့ဝံၩ့ဝၩ့လီၫတၭ ဖါဖါအဲၪ့လိၬအဝ့ၫ ဘၪနီၪလဲၪစွါဘဲၫ ဎွ့ယၪၥံၪလဂဲၫအဲၪ့လၧၩ့ဘၪဧၪဘဲၫႉ ယၪန့ဒီၭ လၧခဲၫ့ကဘံၪ့အခၫ လီၩဝ့ၫဒီၭ လီၩဝ့ၫကဘျၩ့ဂီၩ့ကဘျၩ့အခၫ ဖါဖါၥၭထၪ့တၭ ထးဘၪအဝ့ၫလၧ ခွ့ၫဘီၩ့နီၪလီၫႉ ကထုၪ့ဎး နမိမိ ကဲၪထၪ့ ချံၭဂီၩ့ ထဲၩ့စဲၪ့လၩ့လၧ ထံၫကျၩ ဂဲၫထဲၩ့ထၪ့ထဲၩ့နးကၠၪလၧၩ့အ့ၬႉ နးမံၩ့ဖီၫဝီၩလဂၩ နါဂၧၫ့ဘၪဆၧအဂဲးအဖးယီၩဂီၩ့အခၫ အၥၭမုၬအ့ၬ လ့ၩစဲၪ့လၩ့လၧ အမိမိအီၪအလးနီၪလီၫႉ

          နးမံၩ့ဖီၫဝီၩလဂၩ လ့ၩဆၧၫ့နၩ့ဂၪ့ဂီၩ့ ခိၬအမိမိလၧ ထံၫချိၬအနဲၩ့ထံၭနီၪလီၫႉ ထီးနီၪ အမိမိချံၭယီၩ ဂဲၫထဲၩ့ထၪ့လၧ ခီၫ့ၥွံၪခိၪဂီၩ့ ဂဲၫဒုၭအီၩ့အဖိၪမုၪနူနီၪလီၫႉ လၧခဲၫ့ စံၭအဖိၪမုၪ ဖိၪမုၪဧ့ ကကၠၪယီၩ မိမိမွဲၦၡၩလၧၩ့အ့ၬဘိၭ အီၪကၠၧၫ့ကၠၧၫ့လၧ ဖိၪမုၪန့လၧၩ့အ့ၬ မိမိခဲၫ့ကံၭ နဖါဖါ ကလီၩ့ဎွါထဲၩ့အမၫအၥၫ့နီၪလီၫႉ အ့ၪမွဲ အမၫအၥၫ့န့ထဲၩ့စွါဘဲၫ မိမိခဲၫ့ကံၭ ကမၩနၧၩ့မၩစၪ ဖိၪမုၪနီၪလီၫႉ မိမိယၪ့ၥၭဖိၪမုၪလါနၫ့ မၩအ့ၪဖိၪမုၪန့နးမံၩ့အ့ၬ နီၪလီၫႉ နးမံၩ့ဖီၫဝီၩ လ့ၩလၧ အမိအီၪဂီၩ့ ဂဲၫထဲၩ့ထဲၩ့လၧဂံၪ့နီၪလီၫႉ နးမံၩ့ဖီၫဝီၩ ခီၫလၧ ၥ့ၪယၫအမိမိအီၪအလးအိၩ လ့ၩလၧ အမိမိအီၪ ကိၭနံၩဒ့ၭနီၪလီၫႉ

          ထီး လယံၬလမီးဘၪအဖၧၩ့ နးမံၩ့ဖီၫဝီၩ အဖါဖါလဂၩ ဂဲၫထဲၩ့န့ထဲၩ့အမၫအၥၫ့ကဂၩနီၪလီၫႉ အမၫအၥၫ့ယီၩမွဲဝ့ၫ ၦမုၪမဲၫတၭ အဖိၪမုၪဂဲၫထဲၩ့ပၫထဲးဎုၬ နံၫဂၩနီၪလီၫႉ အဖိၪမုၪနံၫဂၩနီၪ မွဲအၥုၪ့ဂ့ၩၥၭဘွၩ အီၪနးဆံၭအ့ၬႉ ၦမုၪမဲၫယီၩ အၪ့န့ နးမံၩ့ဖီၫဝီၩ အဖါဂီၩ့အခၫ ဒၪနးမံၩ့ဖီၫဝီၩနီၪ  အိၭအ့ၬ လကၭဒံၭဘၪ မၩနၧၩ့မၩစၪဝ့ၫဒံၭနီၪလီၫႉ အဝ့ၫအဖါဖါဝ့ၫ ခီၫလၧအမၫအၥၫ့အီၪဂီၩ့နီၪ ယိထွ့ၫအဖိၪမုၪ နးဆံၭလၧၩ့အ့ၬႉ အဝ့ၫခိၭနၪမွဲ အမၫအၥၫ့အဆၧချဲၩ့လီၫတၭ နးမံၩ့ဖီၫဝီၩလဂၩ ဘၪထိးမၩနၧၩ့မၩစၪ ၥိၭကီၩ့ဘၪ ဆၧကီၩ့ဆၧၥိၭ ဂ့ၩဂ့ၩနးကၠၪအ့ၬနီၪလီၫႉ အဝ့ၫဘၪထိးအၪ့မၧၫ့ဘဲၫၥိၭ ၦၡၩအဎီးနီၪလီၫႉ နးမံၩ့ဖီၫဝီၩလဂၩ လ့ၩလၧအမိမိအီၪဂီၩ့ လီၩအ့ၪဝ့ၫအခီၫပယီၫထီးအလူၬအခၫ အမိမိၥၭဘီၩ့ယၫ့ၥၭ အမိမိဖ့ၪလၫ့စိၩ ထီးၥံၪႇ ဆၧကီၩ့ဆၧၥိၭၥံၪဒဲ ၡၪ့အဂ့ၩၥံၪနီၪလီၫႉ လါနၫ့ အဝ့ၫ ဂဲၫထဲၩ့ထီၩ့လၧဂံၪ့အခၫ အမိယါၦမုၪမဲၪနီၪ စံၭဝ့ၫ ဆၧလဖၪၥံၪယီၩ နဂဲၫထဲၩ့အၪ့ဂူၪန့ မွဲအ့ၬဧၪ အၪ့န့ခွံၬဝ့ၫထီးအလူၬဂီၩ့ ဖ့ၪလၫ့အ့ၪ အဖိၪမုၪနံၫဂၩနီၪလီၫႉ နးမံၩ့ဖီၫဝီၩလဂၩ ကမွဲဒၪ အမိမိ ဖ့ၪလၫ့အ့ၪဆၧနးမံၩ့ အမိယါအၪ့န့ခွံၬအဆၧ ထီးအလူၬနီၪလီၫႉ

          ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ လၩ့ယၪ့ၥၭဝ့ၫဒၪ နးမံၩ့ဖီၫဝီၩလဂၩ ဘၪအီၪလၧ အမိယါအဆၧမၩနၧၩ့မၩစၪအဖၧၩ့ ၦၡါဖိၪယီၩ ကဂဲၫကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ