ဆၧလၧဆၧချဲၩ့နီၪ ဆၨၩကဆၨၩလလၩ့မါဘၪအဂး အရ့ၩဒိၪဝ့ၫဒၪ ပကဘၪချဲၩ့ထၪ့အဆိၩဆိၩ မွဲဆၧမၩကမံၩ့နီၪလီၫႉ ဆၨၩကဆၨၩ ဂဲၫကဲၪထၪ့ယူၭစွါဘဲၫ ဆၧချဲၩ့ဂဲၫပၫထဲးဎုၬယူၭလီၫႉ ဆၧချဲၩ့ယီၩအီၪဝ့ၫအကၠီၩ့ ပကိၭထၪ့န့လၧ ဆၨၩကဆၨၩလီၫႉ ဆၧချဲၩ့နီၪ အီၪဝဲၩလၧ နံၪ့ဆံၫလၩယံၬ ဖံၫဖူၫၥံၪကဆၫ့ဘၪကဆၫ့ ဂဲၫထဲၩ့ချဲၩ့ထၬခီၫလၧ ဖျိၩ့ဖျိၩ့အိၩနီၪလီၫႉ ထီးလၧပအီၪမုဆၫကနံၩယီၩ ဆၧချဲၩ့နီၪ ပချဲၩ့လၧၩ့အ့ၬဂီၩ့ ပကျ့ၭမၩလၩ့မါခွံၬဧၪႉ အ့ၪပမၩလၩ့မါခွံၬစွါဘဲၫ ကမီၪ့ဎီၩ့ဒၪ ဖံၫဖူၫၥံၪလၧဖျိၩ့ဖျိၩ့အိၩအခိးအတၩနီၪ ပမၩဂၭဂီၩ့ ဂၭစၪခွံၬနီၪလီၫႉ

ထၧၫ့ဖုဝဲဖျိၩ့ဆၨၩဖိၪၥံၪဧ့ႇ ပကဲၪဖျိၩ့ဆၨၩမီၪ့ဎီၩ့ ပဒၪလိၬၥၭအခၫမွဲဂ့ၩ ႇ ပအီၪလၧဂံၪ့အခၫမွဲဂ့ၩ ကြၨၭပချဲၩ့ထၪ့ထဲၩ့ ပဖျိၩ့ဆၧချဲၩ့နီၪလီၫႉ မိဖါလဖၪ ကြၨၭချဲၩ့ဒုၪ့ဂၧၩ့အဖိၪၥံၪလၧ ဖျိၩ့ခီၫတၡါလီၫႉ ပမွဲဝ့ၫဖျိၩ့အဂံၪ့ဒီၪ့ဂီၩ့ ပကဲၪမိဖါၥံၪလဖၪ လၧပချဲၩ့ဘၪဖျိၩ့စွါဘဲၫ ဖိၪၥၪၥံၪလဖၪ ကချဲၩ့ထၪ့ဖျိၩ့ဆၧချဲၩ့လၧၩ့အ့ၬနီၪလီၫႉ မိဖါၥံၪလနၩ့နၩ့ ဘဲၫအဖိၪၥံၪကချဲၩ့ဖျိၩ့ကၥ့ၪအဂး အ့ၪဆၧမၩလိၪလး ဖၭဘံၭအခၫ ၥိၪ့ထၬအဖိၪၥံၪလၧ ၦချဲၩ့ဖျိၩ့ဆၧချဲၩ့အၪအဝ့ၫၥံၪအတဝၫ့နီၪလီၫႉ ၦဖျိၩ့အတဝၫ့ကနၩ့နၩ့ လၧၥုၪ့လၧမုၬၥၭလမုၬဘၪအဖၧၩ့ ပကဒၪဘၪ ချဲၩ့ကၠၭဖျိၩ့ဆၧချဲၩ့လၧၩ့အ့ၬနီၪလီၫႉ ဆၧဘၪကဲၪထၪ့ဝ့ၫဘဲၫယီၩၥိၭနီၪ အီၪစၭထၪ့လၧ မွဲမိဖါၥံၪလဖၪ လၧချဲၩ့လၧၩ့ဘၪဖျိၩ့ဆၧချဲၩ့နီၪလီၫႉ မွဲဆၧဘဲၫနီၪ ဖိၪၥၪၥံၪ ချဲၩ့မွဲဂ့ၩ ချဲၩ့အ့ၬမွဲဂ့ၩနီၪ ပကဲၪမိဖါလဖၪ ကဘၪချဲၩ့ဝ့ၫလိၫနီၪလီၫႉ အနီၪတၭ ဖိၪၥံၪလဖၪ ကဂဲၫချဲၩ့ထၪ့ကဆံၭဆံၭနီၪလီၫႉ

ဖျိၩ့ဖိၪလနၩ့နၩ့ ချဲၩ့ဖျိၩ့ၥ့ၪဂ့ၩဘၪစဲၪ့လါနၫ့ဂ့ၩ ကဂၩဒဲကဂၩအ့ၪဒၪလိၬၥၭအခၫ ချဲၩ့ဖျိၩ့ဆၧချဲၩ့အ့ၬဂီၩ့ ချဲၩ့ဒုၪ့ဖံၭၥိၭလိၭၥၭမွဲ လၧပယၩ့ခီၫနီၪလီၫႉ အ့ၪချဲၩ့ထၪ့ဘၪလၧပယၩ့ခီၫမၬ စီၪဎိၩလၩ့ကၠၭအၥၭ အၡါမၪနီၪ ပချဲၩ့ထၪ့လၧပဆၧချဲၩ့ဘၪအကၠီၩ့ ပကဘၪ အၪ့အူၭလၩ့ပၥၭ နီၪလီၫႉ လၧဂၪ့ခိၪချိၫ့ယီၩ ဖျိၩ့ဆၨၩနီၪမွဲထၪ့ဖျီၪ့ဝ့ၫလၧ ဆၨၩလၧအဲၪဒိၭ ဆၧတီၩဆၧလီၩ ဆၧၥုၪ့ဂ့ၩၥၭဘွၩ ဒဲ အဆၧအုၩ့လၩ့ဂုးခၧၫ့နီၪ မွဲၦၡၩၥ့ၪယၫကိၭဂၩဒ့ၭလီၫႉ