ထၧၫ့ဖုဝဲထံၩၥိၭ ၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ မုကနွ့ၫယီၩ ၦဖျိၩ့ၡါဖိၪအနိၪ့ဖၧၩ့ ယမိအဲၪဒိၭ လီၩဖ့ၪနဲၪဘၪနၥံၪ ၦဖျိၩ့ၡါဖိၪ အခိၪတၩ့နီၪမွဲ ထၧၫ့ဖုဝဲဖျိၩ့ဖိၪၥံၪ နါဂၧၫ့ယံၫယါၡါဖိၪကယွ့မွဲဝ့ၫ နးမံၩ့ဖီၫဝီၩ ၡါဖိၪနီၪလီၫႉ

          လၧဖျိၩ့ဖျိၩ့အိၩ ၦထၧၫ့မၫဝၩအီၪဝ့ၫ နံၫဂၩနီၪလီၫႉ အဝ့ၫၥံၪနီၪ အဖိၪမုၪအီၪဝ့ၫ ကဂၩဂီၩ့ အမံၩ့နီၪ ကိၭဝ့ၫလၧ နးမံၩ့ဖီၫဝီၩနီၪလီၫႉ ကနံၩနီၪတၭ နးမံၩ့ဖီၫဝီၩ အမိမိဒဲအဖါဖါ လ့ၩလီၩ့ဎွါယၪလၧ ထံၫချိၬဖၧၩ့အထီ နးမံၩ့ဖီၫဝီၩ အဖါဖါဝ့ၫ အယၪန့ကဘံၪ့နီၪလီၫႉ နးမံၩ့ဖီၫဝီၩ အမိမိဝ့ၫဒၪ ဆၧဂဲၫခံၭလၩ့ယူၭဘိၭ ‘‘နးမံၩ့ဖီၫဝီၩအဖါဖါဧ့ ယၪန့ကဘံၪ့ယူၭဘိၭ လၧၫ့အၪ့ပဖိၪမုၪနးမံၩ့ဖီၫဝီၩယူၭ’’ စံၭအဝၩဘဲၫယီၩၥိၭအခၫ အဝၩစံၭဆၧၫ့ထဲၩ့ ‘‘နးမံၩ့ဖီၫဝီၩ အမိမိဧ့ လီၩဆၧဘနီၭလဂ့ၩဘိၭ အီၪယံၬပယၪဂဲၫအဲၪ့လၧၩ့အ့ၬ’’ ဘဲၫလီၩဝ့ၫအထီ နးမံၩ့ဖီၫဝီၩ အဖါဖါ အယၪန့ဒီၭကဘံၪ့ဒီၭ နီၪလီၫႉ ထီးနီၪ အမၫၥၭဘီၩ့နးဆ့ ဆၧဂဲၫခံၭလၩ့ယူၭတၭ ‘‘နးမံၩ့ဖီၫဝီၩ အဖါဖါဧ့ ပယၪန့ဎွ့ၪယီၩဘၪယူၭ ပကထဲၩ့ကၠၭဂံၪ့’’ လီၩဝ့ၫကဘျၩ့ဒီၭနီၪလီၫႉ လၧခဲၫ့ အဝၩၥၭဘီၩ့နီၪၥၭထၪ့ စံၭအမၫ အၩလၩ နးမံၩ့ဖီၫဝီၩအမိမိဧ့ လိၬအၪနနိၭလဂ့ၩ ဘဲၫလီၩဝ့ၫအထီ ယၪန့ကဘံၪ့ဒီၭနီၪလီၫႉ လၧခဲၫ့ ယၪန့ၥၧၫ့ဘံၪ့ယူၭ ဆၧဂဲၫခံၭလၩ့မနဲဒ့ၭယူၭဘိၭ မၫၥၭဘီၩ့ယီၩ ဘဲၫကိၭဘျၩ့ဘျၩ့အိၩအၥိၭ စံၭအဝၩ ပကထဲၩ့ကၠၭနီၪလီၫႉ ကဘျၩ့ယီၩ အဝၩၥၭထၪ့တၭ အၪ့ခွ့ၫယၪလၧၩ့အ့ၬဂီၩ့ ထးအမၫအခိၪဎွံၪလၧ ခွ့ၫဘီၩ့ဂီၩ့ ဆၧမုၪယီၩ ပဘၪလီၩ ကၪဖုၬအ့ၬ ကဲ ကဲၪပၥ့ၪလဲၪ လီၩဝ့ၫလၧ ဆၧၥၭထၪ့ၥၭဖျဲၩ့အဖၧၩ့နီၪလီၫႉအထီနီၪ လၧဆၧလယိလါဘၪအဖၧၩ့ အမၫၥၭဘီၩ့နီၪ ကဲၪထၪ့ ချံၭကဘံၪ့ဂီၩ့ ထဲၩ့စဲၪ့လၩ့လၧ ထံၫကျၩနီၪလီၫႉ အထီနီၪ နးမံၩ့ဖီၫဝီၩအဖါဖါ ၥၭဘီၩ့နးဆ့ မွဲစီၪဆၧလဘၪလၧၩ့ဘၪနးမံၩ့ဂီၩ့ ဂဲၫထဲၩ့ထဲၩ့လၧအဂံၪ့ လၧၥုၪ့လမုၬ ၥၭလမုၬဘၪအဖၧၩ့နီၪလီၫႉ

          အထီနီၪ နးမံၩ့ဖီၫဝီၩဝ့ၫ အီၪဒၪနူဒံၭနီၪလီၫႉ မွဲဆၧဘဲၫနီၪ နးမံၩ့ဖီၫဝီၩ အမိမိ ကမွဲဒၪလ့ၩနးစီၪ့ အီၪခိၬဝ့ၫလၧ ကဂဲၫထဲၩ့ဂံၪ့ ကိၭကၠၪဒ့ၭနီၪလီၫႉ ဘဲၫယီၩကကၠၪယီၩ နးမံၩ့ဖီၫဝီၩ ဒၪအဖါဖါ ဂဲၫထဲၩ့လၧဂံၪ့ကဂၩလီၫတၭ အၪ့စၪ့ဝ့ၫ ဖါဖါဧ့ မိမိဂဲၫထဲၩ့ဒ့ၭအ့ၬဧၪ နီၪလီၫႉ အဖါဖါ စံၭဆၧၫ့ထဲၩ့ နမိမိ ဘိၬထးၥံၪ့မုလၧ ဖၧၩ့ၥၭအိၩအကၠီၩ့ ကယံၬကဆံၭဖိၪအကၠီၩ့ အဖါအၪ့လီၫထၬနီၪလီၫႉ နးမံၩ့ဖီၫဝီၩလဂၩ ခိၬအမိမိကဂဲၫထဲၩ့ ထီးဆၧခံၭယိၬထၪ့ အဝ့ၫၥၭဝံနူယူၭ အမိမိဂဲၫထဲၩ့လထီၩ့ဒံၭဘၪ အခၫ အၪ့စၪ့အဖါဖါ ၥၧၫ့ဘျၩ့နီၪလီၫႉ

          ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ လၩ့ယၪ့ၥၭဝ့ၫဒၪ နးမံၩ့ဖီၫဝီၩလဂၩ အီၪခိၬယိလါအမိမိ မကဂဲၫထဲၩ့ဒံၭဧၪ ၦၡါဖိၪယီၩ ကဂဲၫကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ