လၧခးပယၩ့ဖၧၩ့ယီၩ အၪဒၪဆၧတဝၫ့လးကျဲၩ့လဖၪဒဲ လၧဝံးဖၫ့ခိၪလးကျဲၩ့လနၩ့နၩ့ ကိၭနံၪ့ဒ့ၭ စၭထၪ့လၧ လၩမၭနီၪ ထီးထီၩ့စိၩလၩမ့ၫအထီ ဘၪဒၪဎီၩ့ဆၧၫ့ယၫ ထံၫလၧပအီၩၡၩဝ့ၫဒၪနီၪ ကအီၪယံၬဖိၬဘိၭ ဆံၫနံၪ့ယူၭနီၪလီၫႉ ဘဲၫယီၩ ၂၀၂၄နံၪ့ နးဆ့ စစ်ကိုင်း၊ မကွေး၊ ပဲခူး၊ မန္တလေး၊ တနင်္သာရီ ရခိုင်ဒဲ ကယားဆၨၩခးဒီၪ့ဖၧၩ့ လးကျဲၩ့လဖၪ စၭထၪ့ဒၪဎီၩ့ဆၧၫ့ယၫ ထံၫပအီၩၡၩဝ့ၫဆၧကၪဆၧဂဲၩယူၭနီၪလီၫႉ ဆၧယီၩအဖၧၩ့ ဆၧဒုၭၥုၭအကၠီၩ့ ၦလၧဘၪဎဲၪ့ဆၧ ဒုၭၥုၭၥံၪလဖၪ မွဲပၫဆ့နီၪလီၫႉ ဆၧအယီၩနီၪ မွဲကဲၪ့ထၪ့ဝ့ၫဒၪ ကိၭနံၪ့ဒ့ၭနီၪလီၫႉ လံၩလၩ့ထီ ဂဲၫနုၬလၫ့ဆွံနးဆ့ မွဲဆၧကၪဆၧဂဲၩကမံၩ့လီၫႉ

ဆၧဆၧၩ့ဒဲလံၩမုလဖုၬကိၪ့ၥ့ၪ ဆရၫဒိၪ အူၩထိၩ့လွ့ၫ လၧအမၧၫ့ဒံၭအိၩ ဖ့ၪလၫ့ဆၧထုၪ့ၥုၪ့ထုၪ့ၥၭ လီၩဝ့ၫခိၪ မၪခိၪမၪအၥိၭ ခးပယၩ့ယီၩ ကနံၪ့ဒဲကနံၪ့ ကဂဲၫခိထၪ့ဂီၩ့ လံၩလၩ့ထီနုၬလၫ့ဆွံဂီၩ့ စဲၪ့ထၪ့ထဲၩ့ဖျဲၪအကၠီၩ့နီၪလီၫႉ လၧစကဲၩ့ခးဒီၪ့ဖၧၩ့ တဝၫ့အၪဒၪဆၧနီၪ ထီၩ့လၧဆၧယီၩခၫအထီ ဘၪဒၪဎီၩ့ဆၧၫ့ယၫ ထံၫၡၩဆၧကၪဆၧဂဲၩနီၪလီၫႉ ဆၧကၪဆၧဂဲၩယီၩ ကနံၪ့ဒဲကနံၪ့ အီၪမွဲဂဲၫအၧၩ့နၬထၪ့လီၫႉ အထီဘဲၫယီၩ ဆၧဒုၭၥုၭကဲၪ့ထၪ့အကၠီၩ့ ကိၭနံၪ့ဒ့ၭ ၦလၧအဂဲၫမၩဘိၪ့ထံၫလဖၪ ဘၪဂဲၫကၪဂဲၩဝ့ၫတၭ ဂဲၫထီၩ့လၧၩ့အ့ၬအကၠီၩ့ တဝၫ့ဆါၥံၪလဖၪ လီၩဝ့ၫဒၪလီၫႉ

အၡါမၪနီၪ လၧဆၧအၥၭမၧၫ့ၥံၪလဖၪအဂး ထံၫနီၪ မွဲအရ့ၩဒိၪထုၬလီၫႉ ခိဆၧၩ့ချံၪ့ အၪ့လဲၩထၪ့အၥၭအကၠီၩ့ ဆၧဆၧၩ့ၡၩ ႇ ဆၧဆၧၩ့လၧၩ့အ့ၬၥံၪနီၪ ကဲၪထၪ့ လၧဖံၬဖၫ့လၬထံၫကဎွ့ၩလၫ့ထဲၩ့အဂးလၩ့ၡၩနီၪလီၫႉ ဆၧဆၧၩ့ၡၩ အကၠီၩ့ ဘဲၫဘၪထဲးဘၪဎဲး ဖံၬဖၫ့လၬထံၫအၥိၭ ဆၧဆၧၩ့အၪအကၠီၩ့ ဂဲၫဘျံၭထၪ့ဝ့ၫဒၪထံၫလဖၪနီၪ နုၬလၩ့လၧထံၫ ဖၧၩ့ဖၧၩ့တၭ ဘၪၥလိၪၥလံၬထၪ့နီၪလီၫႉ ဆၧလၧထံၫနီၪဂ့ၩဒိၪဝ့ၫလၧ ပမိၡါခံးဂၩ့အဂး လကၭဘၪ ပဒၩ့ထၬအ့ၪပၧၩ ဆၧဆူၭဆၧဆၫၥံၪန့ အခိးအတၩဎိၩဒိၪဝ့ၫအၪမၬလီၫႉ

ထံၫအဆံၫ့အဖျ့ၪဂဲၫလၩ့ၡၩဝ့ၫဒၪ ဂၪ့ခိၪဖံၬ ၇၀ယၩဒူၩနီၪ ထံၫလုၭဘံၭနးဆ့ ထံၫအဆံၫ့အဖျ့ၪ ထံၫလၧပအီၩ လၩ့ၡၩဝ့ၫအၪမၬလီၫႉ ဂၪ့ခိၪထံၫအထုၪ့ ဖိၬဘိၭ ၃ယၩဒူၩနီၪ မွဲဒၪထံၫအဆံၫ့အဖျ့ၪအကၠီၩ့ ပၥ့ၪယၫဘၪလီၫႉ မွဲဆၧဘဲၫနီၪ ဂၪ့ခိၪၡၩအဆၧဝံဆၧနၬ ဖိၬဘိၭ (၂. ၄)  ဘံၫလံၫယၫ့နီၪ ကဲၪထၪ့ ဂူၭလ့ၩဆၧဆၫႇ ထံၫဒဲ ဆုးကျိၭအၥၭဆၧဆူၭဆၧဆၫလဖၪၥံၪနီၪလီၫႉ အၪဒၪဆၧ နီၪမွဲဝ့ၫဖိၪၥၪဆံၭဒဲ ကိၭနံၪ့ဒ့ၭ ၦၡၩအၥၭ ဘၪၥံၫခွံၬဝ့ၫ ဖိၬဘိၭ နံၫခွးအကၠီၩ့ ပၥ့ၪယၫဘၪနီၪလီၫႉ လကၭဒံၭဘၪ ၡၩအဆၧဝံဆၧနၬ ၂ ဘံၫလံၫယၫ့ဘျဲၪနီၪ အီၪလၧ ထံၫၡၩဝ့ၫဒၪထံၫခးနီၪလီၫႉ