လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ကဆါဎြံၬ အဆၧအီၪက့ၪၥုၪ့ အီၪက့ၪၥၭလၧ န့ၩခၠၧၫအနဲၩ့အဎီၩ့ အဂဲးအကၠီၩ့နီၪလီၫႉ ကဆါဎြံၬ အၪ့ၥီၪ့ပၧၩလၧ လံၬဆံၫ့ဎံၪဖၧၩ့နီၪ မနီၪလဲၪစွါဘဲၫႇ ကဆါယွၩနီၪ မွဲဝ့ၫဒၪ တဲၩ့လၩ့ဆၧ ထီးအလူၬနီၪအကၠီၩ့ ပဆၧနဲၩ ကဘၪအီၪနီၪလီၫႉ ကဆါယွၩ အမ့ၬယၫ ဆၧမၧၫ့ထီးလူၬနီၪ မွဲဝ့ၫဒၪ အလူအဎွ့ၩထုၬဒဲ အရ့ၩဎိၩထုၬနီၪအကၠီၩ့ ကဆါဎြံၬ လီၩဖျီၪထၪ့အ့ၪ အထံၩအဖျဲၥံၪ နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မူၭခိၪထိၪၥံၪနီၪ ဎွံၪလၩ့ဆၧချံၫအ့ၬႇ ကူၭဘုၪဆဲၩအ့ၬႇ ဘုၪဖၫ့အီၪအ့ၬနီၪလီၫႉ လါနၫ့ႇ ကဆါယွၩနီၪ ဒုၭအၪ့အဝ့ၫၥံၪ ဆၧအၪ့ ကိၭနံၩဒ့ၭနီၪလီၫႉ ကဆါဎြံၬနီၪ ဂၪ့ခိၪဖိၪၥံၪ ယိဂ့ၩယိဘၪ ခးၥဲၫ့အဂ့ၩကၥ့ၪအဂး ကိၭဖံၭၥိၭဝ့ၫနီၪလီၫႉ လကၭဒ့ၭဘၪႇ ကဆါဎြံၬနီၪ ဘၪဒၪဆၧၫ့ယၫလၧ န့ၩခၠၧၫထီးအလူၬဂီၩ့ အဆၧအဲၪဆၧကွံၩဒဲ ဖးထၪ့ထီးအလူၬနီၪ မၩဖျီၪထၪ့ဝ့ၫလၧ ခးၥဲၫ့ဖၧၩ့နီၪလီၫႉ ကဆါဎြံၬနီၪ လ့ၩဆၧလၧ အထံၩအဖျဲၥံၪအခံၫ့နီၪ အီၪပွံၩလၧ ဖၧၩ့ၥၭဂီၩ့ ယိစိၩ န့ၩခၠၧၫ ဆၧအဂ့ၩနီၪလီၫႉ ကဆါဎြံၬယီၩ အီၪလၧဆၧတဲၩ့လၩ့ဖိၪၥံၪ ဆၧမၧၫ့ၥံၪ ၥုၪ့ထံးၥၭထံးနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧ န့ၩခၠၧၫအနဲၩ့အဎီၩ့နီၪ မွဲဝ့ၫဒၪ ဂၪ့ခိၪဖိၪၥံၪအဆၧႇ ဖူၫဆိၩဖံၫဆိၩၥံၪ ဆၧန့ၥၫနီၪလီၫႉ လကၭဒ့ၭဘၪႇ ကဆါဎြံၬယီၩ ဆၧဖံၭဆၧမၩ ထီးအလူၬနီၪ မၩဆံၫ့ဖျ့ၪဝ့ၫဂီၩ့ ဆၧလ့ၩထၪ့လ့ၩထီၫ ကန့အဂး ဆၧဖံၭဆၧမၩနီၪ အရ့ၩဒိၪဒဲ ထုၭဖျီၪထၪ့ဆၧဖံၭဆၧမၩ ဆၧလၩဆၧဖၩ့နီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ