လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆၧကဲၪထၪ့ ထီးအလူၬနီၪ ဘၪဆဲၫ့ဘၪထွ့ၫယၧၩအ့ၬ ပဆီၫ့မီၪ့ လန့ဘၪ အဂဲးအကၠီၩ့နီၪလီၫႉ ပကယိလၧ အထီအခံၫ့ယီၩစွါဘဲၫ ဂၪ့ခိၪထၧၫ့ဘံၪ့ယၫ န့ၩခၠၧၫအနဲၩ့အဎီၩ့ ဂၭဂီၩ့နီၪ ဂၪ့ခိၪဖိၪၥံၪ ဘၪဒၪဆၧၫ့ယၫ ကိၭဂၩဒ့ၭနီၪလီၫႉ ၦဂၪ့ခိၪဖိၪၥံၪယီၩ န့ၩခၠၧၫဆၧန့ၥၫ ထီးအလူၬနီၪ ၥိၩ့ထၪ့ဝ့ၫ ဘဲၫၥိၭအဝ့ၫၥံၪ နၫ့ဆါအပိၭအလိၬနီၪလီၫႉ အဝ့ၫၥံၪယီၩ ယိဂ့ၩယိဘၪ န့ၩခၠၧၫ အနဲၩ့အဎီၩ့ နးမံၩ့အ့ၬႇ အီၪဒၪ မၩဂၭဂီၩ့ဆၧနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါကၠဲၭ ဖ့ၪလၫ့ထးအ့ၪ ဂၪ့ခိၪဖိၪၥံၪ အတၩလၫ့နီၪ ကဘၪ ယိဂ့ၩယိဘၪ န့ၩခၠၧၫအနဲၩ့အဎီၩ့ ဒဲ ကဘၪ ယိဂ့ၩယိဘၪလၩ့ အနၫ့ဆါ အနဲၩ့အဎီၩ့နီၪလီၫႉ လကၭဒ့ၭဘၪႇ ဂၪ့ခိၪဖိၪၥံၪ အီၪအၪ့လ့ၩထဲၩ့ႇ ဆၧထုၭထၪ့ဖနံၬ ဒဲ ထံၫခးပၧၩ့ဆၧအဂဲး ဆၧအယီၩထီးအလူၬ ကဘၪလ့ၩထၪ့လ့ၩထီၫ လိၪဝ့ၫဒၪ နီၪလီၫႉ လၧခဲၫ့အရ့ၩဒိၪ ကမံၩ့နီၪ မွဲဝ့ၫဒၪ တခ့ၭဖဝၭနီၪလီၫႉ လကၭဒ့ၪဘၪႇ ပကဘၪ ၥ့ၪယၫၦၡၩ ဆၧလၩဆၧဖၩ့ႇ ဂၪ့ခိၪအဂဲး ဒဲ ဆၧၥၭမၧၫ့ၥံၪ အဂဲးနီၪလီၫႉ လၩ့ဆၫ့ဒၪဆၧႇ ဆၧအယီၩ ထီးအလူၬ ဆုးကျိၭလိၬၥၭ မ့ၬယၫလးခဲၫ့ နီၪအကၠီၩ့ ပကဘၪၥ့ၪယၫနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧန့ၩခၠၧၫအနဲၩ့အဎီၩ့နီၪ ဂၪ့ခိၪဖိၪၥံၪ ထီးအလူၬ ဘၪဒိၭနဲၩ့ၥၭနီၪလီၫႉ လၩ့ဆၫ့ဒၪဆၧႇ ပကၥၫထၪ့အဂး ဖ့ၪအ့ၪပၧၩ အီၭစံၫဂၠံၫ့ႇ ကပဒၩ့ထၬပၧၩလၧ ဆၧအခိအဂး ဖ့ၪအ့ၪပၧၩအထံၭ အမံၩ့မံၩ့ နီၪလီၫႉ ဆၧနီၪအကၠီၩ့ႇ ပအီၪၥၭမၧၫ့လၧ ဂၪ့ခိၪဖၧၩ့ယီၩ န့ၩခၠၧၫအနဲၩ့အဎိၩ့နီၪ ပၥိၩ့ထၪ့န့ကိၭဂၩ လါနၫ့ ပကဘၪ ယိဂ့ၩယိဘၪနီၪ မွဲဝ့ၫဒၪ ဂၪ့ခိၪဖိၪၥံၪ အတၩလၫ့နီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ