လၧအဖီၩ့ခွံၬနံၫၥၧၫ့လံၥၫ့အိၩ ခးထဲၩ့လံၩခံၫကကဲၩ့ခီၫ အလးလနၩ့နၩ့နီၪ ဆၧဆၧၩ့ဎိၩဝ့ၫဒၪအ ကၠီၩ့ ထံၫဎိၩလၩ့ဒဲ ဖံၭလၩ့ဎီးဂီၩ့ ဆၧၥုၪ့ဆၧဒီၩ့လဖၪ လၩ့ဎီးဝ့ၫဒၪနီၪလီၫႉ လၧဆၧကဲၪထၪ့ဘဲၫနီၪၥိၭ အလးလဖၪအကျၩ ချင်းရိုင်ကၭၥလံၬဆၧအီၪကီၪ့ဆ့ မွဲပၫထဲးဆ့အကၠီၩ့ ချင်းရိုင်ကၭၥလံၬဆၧ အီၪကီၪ့ၥၫ့ခိၪဒိၪ ဒဲ ၥၫ့မုၥၫ့ခၫလဖၪ စံၫစတၫလဖၪနီၪ လ့ၩလီၩ့ယိထွ့ၫထဲၩ့ ဆၧအီၪကီၪ့ဖိၪၥံၪအဂဲး ပၥ့ၪယၫဘၪနီၪလီၫႉ

ဆၧဆၧၩ့ဎိၩယီၩနီၪ ဘၪထွ့ၫလၧ လံၩမုလဖုၬယၫဂံၫတဲၫ့ ဂဲၫထဲၩ့ဘၪလၧ ခးဘံၫယနၫ့အထီ ထဲၩ့ဘၪဖျါထဲၩ့ခးထဲၩ့အကၠီၩ့နီၪလီၫႉ ဆၧဆၧၩ့ဎိၩအကၠီၩ့ထံၫလဖၪဂဲၫထၪ့ကဆံၭဆံၭနီၪစၭထၪ့လၧ အစီၩ့မုနံၩအိၩနီၪလီၫႉ ချင်းရိုင်ကၭၥလံၬဆၧအီၪကီၪ့ ကၥံၫဒြဲၫၥရိၬအဖၧၩ့ဆ့ ထံၫထီၩ့လၫ့ထၧၩ့ထီၩ့ လၧဆၧလုဂံၪ့အလးနီၪလီၫႉ ၥၫ့ခိၪဒိၪအကၠီးနီၪနးဆ့ ထံၫထီၩ့လၫ့ ထီၩ့လၧနံၫထၧၫ့လထၧၫ့အလး အကၠီၩ့ၥၫ့ခိၪဒိၪဆ့ အီၪဝ့ၫလၥ့ၪလၧၩ့ဘၪဂီၩ့ ဘၪၥုၭခွံၬအလးနီၪလီၫႉ ထံၫဎိၩလၩ့အကၠီၩ့ မ့ၪလန့လၧၩ့ ဘၪအဂဲး ၥၫ့ခိၪဒိၪJoseph Vuthilert Haelaom ယီၩ လီၩဘၪ Licas news နီၪလီၫႉ

ဂံၪ့နံၫထၧၫ့လဖၪဆ့ ၦၡၩအီၪလန့လၧၩ့ဘၪဂီၩ့ ဂံၫ့အီၪကထၧၫ့လီၫလဖၪနီၪ ဘၪထၪ့အီၪ လၧဂံၪ့အခိၪနီၪလီၫႉ ၦလၧအၥုၪ့ၡါၥၭၡါလဖၪနီၪ ကဎဲၪ့ထံၫဎိၩလၩ့ယီၩအဂး ထၪ့ခွါလၫ့လၧဂံၪ့အ ထီၫလဖၪကနၧၩ့အဂး မွဲလယီၫဘၪလီၫႉ ၦအဘၪထိးထံၫဘျံၭ ဆၧလၩ့အၪ့ယိၫလဖၪနီၪ ခိၭယိ လါဆၧမၩဆၧၩ့ဘိၩ့ဒံၭနီၪလီၫႉ

လၧထံၫဎိၩလၩ့အလးဖၧၩ့ ဆၧမၩလိၪလးလဖၪနီၪ ဘၪဖိၭဘံၭထၬဝ့ၫဂီၩ့ ဆၧမၩလိၪဖိၪ အဂဲၫ အီၪလၧ ဆၧအီၪကီၪ့အဆၧမၩလိၪလးဖၧၩ့လဖၪနီၪ ၥုၭထၬဝ့ၫဒၪလၧ ဆၧလၩ့အၪ့ယိၫလအီၪဘၪ အလးအဂဲးႇ ၥၫ့ခိၪဒိၪယီၩဆ့ ဘၪလ့ၩလီၩ့မၩဆၧၩ့ ဘၪလ့ၩယိထွ့ၫထဲၩ့ ဆၧအီၪကီၪ့ဖိၪလၧ အလိၪ ဘၪဆၧမၩဆၧၩ့လဖၪအကၠီၩ့ မံၫဘၪကဆိကလးလီၫအဂဲးႇ ထံၫဎိၩလၩ့ကဘျၩ့ယီၩနီၪ အၧၩ့န့ကိ ကၠၪကၠၪအိၩဂီၩ့ ဆၧဂၭဂီၩ့ဆိၫ့ခွံၬလဖၪဆ့ အီၪအၪန့ကိကၠၪကၠၪအိၩအဂဲးႇ အဝ့ၫအဆၧၥၭမၧၫ့ဖၧၩ့ ထံၫဎိၩလၩ့ဘိၩယီၩၥိၭနီၪ မွဲလဒၪယံၫယါဘၪဝ့ၫနးကၠၪအဂဲး ၥၫ့ခိၪဒိၪယီၩစံၭဘၪဝ့ၫလီၫႉ

ဘဲၫနီၪအၥိၭမဲဆဲၫ့ စံၫဖရၫ့စံဇ့ၩဘံၫယၩဆၧအီၪကီၪ့ၥၫ့ခၫ Fr.Bancha Apichart vorakul လ့ၩခိၪလ့ၩနါဂီၩ့ လီၩ့အၪ့နၩ့လၩ့ မ့ၩဘီၪ့လဖၪဒဲ ဆၫအၪ့ဆၫအီၩအဂူၫဂၩလဖၪနီၪလီၫႉ ဘဲၫအဝ့ၫၥံၪ မၩဝ့ၫထူၬအလးနီၪ အဝ့ၫၥံၪမၩဆၧၩ့ဝ့ၫလါနၫ့ ဆၧမၩဆၧၩ့လိၪၦၡၩလဖၪ အီၪအၪမၬဒံၭနီၪလီၫႉ

ထံၫဎိၩလၩ့အလးလဖၪ ဘဲၫၡၩခမျၧးကၥ့ၪယၫဒဲ ကဂဲၫမၩဆၧၩ့ကၠၭဝ့ၫအဂးနီၪ အဝ့ၫၥံၪယီၩ လီၩ့ဒိၪန့ထၬဆၧဂၩ့လဖၪဂီၩ့ ထံၭလၫ့ထဲၩ့ဝ့ၫလၧ ဆိၫၡဲၫမံၫဒံၫယၫအဖၫ့ခိၪအဂဲး ၥၫ့ခိၪဒိၪယီၩဆုး ထဲၩ့လီၩဝ့ၫဒံၭနီၪလီၫႉ

 နးအဲၪဖီၫဘွၩ