လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Elizabeth  Ann Bayley  Seton အဂဲးအကၠီၩ့နီၪလီၫႉ ၦဆံၫ့ဎံၪ Elizabeth ယီၩ အီၪဖျဲၪလၧ နံၪ့ (၁၇၇၄) နံၪ့ လၧ ဝံး Newyork  နီၪလီၫႉ အဝ့ၫၥံၪ အဂံၪ့ဒီၪနီၪ မွဲဝ့ၫဒၪ protestan နီၪလီၫႉ အဝ့ၫယီၩ ခီၫလၧ ဖိၪၥၪအခံၫ့ဒၪအိၩ အမိမိၥံၫဖီၩ့ခွံၬအဝ့ၫတၭ ဘၪဂဲၫဎိၩထၪ့လၧ အဖါဖါနီၪလီၫႉ အဝ့ၫယီၩ ယၧၫ့ၥၭ ၦၡၪ့ဖိၪၥံၪအၪမၬဒ့ၭနီၪလီၫႉ  ဆၧနီၪအကၠီၩ့ႇ ၦဂူၫဂၩ ကိၭအဝ့ၫလၧ Protestan မံၭထၭမုၪနီၪလီၫႉ

ၦဆံၫ့ဎံၪ Elizabeth ယီၩ နံၪ့ (၁၇၉၄) နံၪ့ နီၪ ထၪ့ၡါလၧ  ဖနံၬဖိၪ William နီၪလီၫႉ အဝ့ၫၥံၪအဖိၪန့ထၪ့ (၅) ဂၩ ဂီၩ့ William ယီၩ အီၪလဆီၫ့ဘၪအကၠီၩ့ ၥံၫဖီၩ့ခွံၬဝ့ၫဒၪနီၪလီၫႉ  ဆၧနီၪအကၠီၩ့ ၦဆံၫ့ဎံၪ Elizabeth ယီၩ လ့ၩအီၪလၧ ကၭၥလံၬဂံၪ့ဒီၪကဒီၪ့နီၪလီၫႉ ယံၬထၪ့ကကၠၪ အဝ့ၫယီၩ အဲၪဒိၭကဲၪထၪ့ ဎရံၬဖိၪကဂၩနီၪ အကၠီၩ့ ဘၩဆိၪဖၪဆၧလၧ ကဆါဎရံၬအီၪ လကၭဒ့ၭဘၪႇ ဒိၭနဲၩ့ နးမၫရံၫယၫ နီၪလီၫႉ လါနၫ့ အဝ့ၫအထံၩအၥိၭဒဲ အဘူၭအထံးၥံၪနီၪ  ဘၪၥုၪ့ဘၪၥၭလအီၪဘၪ  အကၠီၩ့ လီၩဎွါ ဆၧဘၪမၪလၧ  အဝ့ၫအဖၫ့ခိၪ အမံၩ့မံၩ့နီၪလီၫႉ  အဝ့ၫယီၩ ဒၪဆၧၫ့ယၫ ဆၧကၪဆၧဂဲၩယီၩ ဒူၩဒူၩနီၪလီၫႉ

လယံၬလမီးဘၪ ႇ ၥၫ့ခၫ Dobore ယီၩ ကဝဲထၪ့ ၦမုၪကၠီးအဂး ကိဖံၭၥိၭ အဝ့ၫနီၪလီၫႉ လၧခဲၫ့နီၪ ၥၫ့ခိၪဒိၪ Bartimo ဖ့ၪလၫ့အခွ့းနီၪ အကၠီၩ့ ၦမုၪအကၠီးနီၪ ဝဲထၪ့ထဲၩ့ မံၭထၭမုၪအကၠီးနီၪလီၫႉ ဆၧနီၪအကၠီၩ့ ႇ ၦဆံၫ့ဎံၪ Elizabeth ယီၩ ကဲၪထၪ့ မံၭထၭမုၪအခိၪနါ  မွဲဝ့ၫ Mother Seton နီၪလီၫႉ လကၭဒ့ၭဘၪ Mother Seton ယီၩ ကၧၩ့ထၪ့ The sister of Charity ခရၧၫ့ဂီၩ့ ဝဲထၪ့ ဆၧၥီၪ့လိၪ ဆရၫကီၠးနီၪလီၫႉ Mother Seton ယီၩ နံၪ့ (၁၈၂၁) နံၪ့ လၩ စၪ့နွ့ၫရံၫ (၄) ၥၫ့နီၪ ၥံၫဖီၩ့ခွံၬဝ့ၫဒၪနီၪလီၫႉ ၦၡၩရွံထၪ့အဝ့ၫ ၦဆံၫ့ဎံၪမုနံၩနီၪ ၦၡၩမၩနဲၪ့ထၬလၧ  ၦမုၪၥံၪအဂး ဆံၫ့ဎံၪ မုၬနံၩနီၪအကၠီၩ့ ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ  မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ