ဂၪ့ခိၪချိၫ့ယီၩ ဆၨၩကဆၨၩ ကဆုးအီၪၥၭမၧၫ့လဆိၩၡၩကန့အဂး (အဂူၫဂၩအဂဲးအဖးလဖၪ စံၭမၬချၭ- ဘၪထိး ၥုၭအဆၧလၩ့အၪ့ယိၫႇ ဘၪထိးမၩနၧၩ့မၩစၪ ႇ ဘၪထိးမၩၥံၫအဆၨၩ (လူမျိုးတုန်း သတ်ဖြတ်မှု)ဆၧလဖၪၥံၪယီၩအီၪလါနၫ့ဂ့ၩ ဆၨၩကဆၨၩအၥၭၥွံၪဖျီၩ့မွဲဝ့ၫ ဆၧချဲၩ့ႇ လံၬလဲႇ ဆၧဆၧးဎံၫဆၧးလၩ ဆၨၩဆၬအခၪ့ထံၭခၪ့ဎၧၩ့ဆၧနဲၪ့လဖၪယီၩ ပကဘၪဖီၪ့ဂုးခၧၫ့ထၬ နီၪလီၫႉ ဆၧလဖၪၥံၪယီၩ အ့ၪပဆုးဖီၪ့ဂုးထၬစွါဘဲၫ ဆၨၩယီၩ မွဲကလၩ့မါန့နးဆိၬအ့ၬနီၪလီၫႉ ပမူၩဒၩအီၪလၧ ပကဘၪဆုးဖီၪ့ဂုးပၥ့ၪလဲၪစွါဘဲၫ ပကဘၪချဲၩ့ ပဆၧချဲၩ့ႇ ပကဘၪမၩလိၪကွ့ၭ ပလံၬလဲႇ ဘၪထွ့ၫလၧ ပဆၧဆၧးဎံၫဆၧးလၩ ဆၧကီၩ့ဆၧၥိၭလဖၪ ပကဘၪၥိၩ့ ၥိၭကီၩ့ထၪ့ႇ လပၥၭနၪ့ဘၪ ပလုၫလါထူၫၡူၫနီၪ ကမီၪ့ဎီၩ့ဒၪ ပဆုးဖီၪ့ဂုးခၧၫ့ထၬ ပဆၨၩနီၪလီၫႉ

ဆၨၩကဆၨၩနီၪ ပကဘၪဖီၪ့ဂုးခၧၫ့ထၬ ဆၧချဲၩ့ လံၬလဲ ဆၧဆၧးဎံၫဆၧးလၩ လကၭဘၪ အခၪ့ထံၭခၪ့ဎၧၩ့မွဲဝ့ၫ ဆၨၩဆၬ (လမွဲဘၪ)  ဆၨၩနီၪ ပကဘၪယိထွ့ၫလိၫဝ့ၫဒၪလီၫႉ ပကဘၪအဲၪပဆၨၩမၬ လပၥ့ၪယၫဘၪနီၪ ဆၨၩဆၬအၥၭကဂဲၫလၩ့ဖုၬဂီၩ့ ကယဲၩ့ထၪ့လၧ ဆၧချဲၩ့ လံၬလဲ ဆၧဆၧးဎံၫဆၧလၩ လဖၪၥံၪနီၪလီၫႉ ဘဲၫၥိၭ ပဆၨၩလလၩ့မၬဘၪအဂး ဆၨၩကိၭဆၨၩဒ့ၭ အမူၩဒၩအီၪဝ့ၫလီၫႉ ဆၧအုၩ့လၩ့ အ့ၪလဂုးခၧၫ့ဘၪ ကဘၪထိး ဆၧအုၩ့လၩ့ဖ့ၪ ဆၧမၪနီၪလီၫႉ အ့ၪပဂဲၫကဲၪထၪ့ၦၡၩလၧ ဆၨၩအနီၪအဂးစွါဘဲၫ ဆၨၩအနီၪအခိးအတၩနီၪ ပကဘၪနၪၥ့ၪလီၫႉ

ဖံၫဖူၫဆၧချဲၩ့ဒီၩ့အီၪဝ့ၫဒၪ ဖံၬအၪ့ယုနီၪ ဆၨၩလလူၬ ၦၡၩအ့ၪယုမၬ ဆၨၩကလူၬ (မြေမျို၍လူမျိုးမကုန် လူမျိုမှ လူမျိုးကုန်မည်) နီၪလီၫႉ လၧပဂၫ့အထီဒၪအိၩ အီၪယံၩယါဆၨၩကဆၨၩမွဲဝ့ၫ ပၠူၫ ဆၨၩနီၪ ထီးမုဆၫကနံၩယီၩ မွဲလပဒၪလၧၩ့ဘၪလီၫႉဘၪကဲၪဝ့ၫဒၪဘဲၫယီၩၥိၭနီၪ မွဲအဝ့ၫၥံၪ လယိထွ့ၫဖီၪ့ဂုးဘၪအဆၨၩအကၠီၩ့နီၪလီၫႉ ယိဝ့ၫန့ ဆၧအဲၪဆၧကွံၩအနိၪ့ ႇ ခီၫၡၩလဂ့ၩဘၪနီၪဂီၩ့ ထၪ့အီၪဎုၬလၧ ဆၨၩဂူၫဂၩနီၪ အခံၫ့ယံၬထၪ့အခၫ ပဆၨၩကလၩ့မၬနီၪလီၫႉ လၧခးပယၩ့ဖၧၩ့ယီၩ ၦဖျိၩ့ဆၨၩဖိၪၥံၪအီၪဎံၩ့လးလါနၫ့ ပဒၪပဆၨၩဖိၪအ့ၬဂီၩ့ ပဆၨၩမီၪ့ဎီၩ့ ပအၪ့န့အဆိၩလန့ဘၪနီၪ မွဲပဆၧမၪဎိၩဒိၪ ကမံၩ့နီၪလီၫႉ ထံၫအီၪထၬဝဲၩ့ယူၭလါနၫ့ လပမၩဆံၫ့ဖျ့ၪဘၪ ပမိၡါဘၪၥလိၪၥလံၬလဖၪနီၪ မွဲဒၪပဆၧမၪလီၫမွဲအ့ၬဧၪႉ

ဘဲၫၦဖျိၩ့ဆၨၩဖိၪၥံၪ လုၫလါထူၫၡူၫအီၪထၬဝဲၩအၥိၭ ဖံၫဖူၫၥံၪမၩထၬဆၧနဲၪဒီၩ့အဂ့ၩ ဆၧအီၪဎုၬမုၬနီၪ ပကဘၪဆုးဖီၪ့ဂုးထၬလၧ ပဆၨၩလလၩ့မၬဘၪအကၠီၩ့နီၪလီၫႉ ၦလနၩ့နၩ့လီၩ့ကၠၭဝ့ၫဒံၭႇ အထီဘဲၫယီၩ ထီၩ့လၧ ဆၧၫ့ထီလ့ၩထၪ့လ့ၩ ထီၫ့ယူၭအကၠီၩ့ လၧပဘၪပၥၭဆၨၩနီၪ ပအီၪဎုၬန့ နီၪလီၫႉ ဆၧအီၪဎၬထၪ့ဆၧဘဲၫယီၩၥိၭနီၪ ကနံၩအဝ့ၫအဆၨၩကလၩ့မါတၡါနီၪလီၫႉ ဘဲၫပအီၪက့ၪဒိၪပဆၧဘိၪ့ဆၧဘၩအၥိၭ ပကဘၪအီၪက့ၪလူ့ဒိၪဎွ့ၩဒိၪပဆၨၩဆ့နီၪလီၫႉ ကဲ ထၧၫ့ဖုဝဲထံၩၥိၭ ၦဖျိၩ့ၥၭဘၪ ၦလၧကကဲၪထၪ့အထီအယၫ မိဖါလဖၪၥံၪဧ့ႇ ဘဲၫပဆၨၩလလၩ့မါဘၪအဂး ပၧၩအကၠီၩ့ အထီလၧယၫဖိၪလံၩၥံၪလဖၪ ဘဲၫအၥွံၪလလဲၩ့မွံၩဎုၬဘၪအၥၭလၧ ဆၨၩဂူၫဂၩအကၠီၩ့ မွဲပကဲၪၥၭဘၪ့ၥံၪပမူၩဒၩဒဲ ဖျိၩ့ၥၭဘၪ့ၥံၪထီးလူၬ မွဲကရွံန့ ထၪ့အီၪ့ဎုၬဒၪဝ့ၫမွဲ ၦဖျိၩ့ဆၨၩအကၠီၩ့ ယအဲၪဒိၭ ဘၪပဂၨၪထၪ့ဘၪနၥံၪလၧ ဆၧအဲၪကွံၩဎိၩဒိၪအဖၧၩ့နီၪလီၫႉ