အဲၪကွံၩဘၪၦခိၭနၪဆၧဖိၪၥံၪဧ့ႇ ၥၭဎွံၫမုၬမုၬကိၭဂၩဒ့ၭလါဆံၭနဲၪႉဆၧလၧၦကဲၪၦၡၩနီၪ ဖီၫအခံၫ့ဘၪပကဘၪဖီၫထၪ့ဝ့ၫဒၪႇၥၪအခံၫ့ဘၪပကဘၪၥၪထၪ့ဝ့ၫဒၪနီၪလီၫႉ ၦဝ့ၫၥံၪလဖၪယီၩ လၧပဖိၪၥၪဆံၭအထီအိၩဖီၩ့မၬလၧမိဖါနီၪ ပကဘၪအဲၪတၧၩ့ၦဂူၫဂၩမွဲလအီၪဘၪလါနၫ့ ပၥၭဂဲၫဎိၩထၪ့ကနံၩကဆံၭဖိၪပကဲၪထၪ့ထဲၩ့ၥၭဘၪ့အထီ ပအၪ့ဎၬလီၩ့ဎွါထၪ့ ဆၧအဲၪဂူၫဂၩ နီၪလီၫႉပဆၧအဲၪလၧမိဖါအဖၫ့ခိၪ လၩ့ၡၩဝ့ၫဒၪဂီၩ့ ပအီၪက့ၪအၪထၪ့ထဲၩ့ပဆၧအဲၪလၧ ၦဂူၪဂၩအဖၫ့ခိၪနီၪလီၫႉၦခိၭနၪဆၧဖိၪၥံၪဧ့ႇပအီၪက့ၪထးပမိပဖါဂီၩ့ ပအၪ့ဎၬလီၩ့ဎွါထၪ့ထဲၩ့ ဆၧအဲၪအၥၫ့ဒဲ မုၪဒဲခွၫပအီၪက့ၪဆၧအဲၪလါခီၫလါဘၪ ဂုးခၧၫ့ဝ့ၫကကၠၪ ပထၪ့ၡါ အီၪဎုၬဒဲ ပမၩကဲၪထၪ့ဝ့ၫဒၪဂံၪ့ဒီၪ့လဒီၪ့နီၪလီၫႉၦခိၭနၪဆၧဖိၪၥံၪဧ့ႇ ဆၧအထူၫအဂူၫယီၩ ဂဲၫထဲၩ့ အီၪဝ့ၫဒၪခီၫလၧအခၫ့ထံၭၥၫ့ဒၪအိၩဒဲအီၪဂုးခၧၫ့ဝ့ၫထီၩ့ မုဆၫကနံၩယီၩလကၭဘၪ ကထဲၩ့အီၪဂုးခၧၫ့ထီၩ့ဂၪ့ခိၪဒံၩခွံၬကကၠၪနီၪလီၫႉ အ့ၪမွဲပကစံၭထၧၩ့ ၦၡၩနၪၥ့ၪနီၪဘိၭ ၦမုၪဒဲၦခွၫဒၩ့ဂံၪ့ဂၩ့ဎၪ့အဆၧအီၪဎုၬယီၩကအီၪဝ့ၫဒၪထီၩ့ အခံၫ့အဆၧၫ့အထီ လဆိၩၡၩနီၪလီၫႉ အခၪ့ထံၭၥၫ့အိၩပကဲၪဝ့ၫဒၪဖိၪၥၪဆံၭဖိၪလဖၪထီးနီၪပဂဲၪဎိၩထၪ့ဒိၪထၪ့ ကနံၩကဆံၭဖိၪ ဒဲ ပကဲၪထၪ့ထဲၩ့ၥၭဘၪ့ဂီၩ့နီၪပၥၭဂဲၫၡါထၪ့ကနံၩကဆံၭဖိၪတၭ ပကဲၪထၪ့ဝ့ၫဒၪ ဖံၫၥၭၡါႇ ဖူၪၥၭၡါ လခဲၫ့ထုၬကကၠၪပဘၪလၩ့စိၩဝ့ၫဒၪလၧဆၧၥံၫအလၩၡၪဖၧၩ့နီၪလီၫႉ ဘဲၫနီၪအၥိၭအခၪ့ထံၭနီၪ ပကဲၪထၪ့ဖိၪၥၪဂီၩ့နီၪပကဲၪထၪ့ၥၭဘၪ လခဲၫ့ထုၬပကဲၪထၪ့ထဲၩ့ဝ့ၫဒၪ မိဖါဖံၫဖူၫလဖၪနီၪလီၫႉ