ထၧၫ့ဖုဝဲထံၭၥိၭ ၦလၧအဲၪဒိၭခိၭနၪ ၦဖျိၩ့ၡါဖိၪၥံၪဧ့ မုကနွ့ၫယီၩ ယမိအဲၪဒိၭလီၩအ့ၪဘၪနၥံၪ ၦဖျိၩ့ၡါဖိၪယီၩအမံၩ့နီၪ မွဲ စီၩ့မၩ့ဎိၩဒိၪ ၦဖျိၩ့ကျိၪ ၡါဖိၪနီၪလီၫႉ လၧဖျိၩ့ဖျိၩ့အိၩ ဝံးအမံၩ့မွဲ နီၫတမၫ့ ဘနီၪအီၪဝ့ၫလီၫႉ လၧဝံးယီၩ အထိၭနၫနီၪ ၦမုၪမဲၫအဖိၪခွၫအီၪဝ့ၫကဂၩလီၫႉ အဝ့ၫနီၪကၠၧၫ့ခီၫကၠၧၫ့နၭလ့ၬ လကၭဒံၭဘၪ အလီၩ့အခံၫထၧၫ့ဂၩယၫနီၪ ထူၭဘၪတၭ ၦၡၩကိၭကၠၭအဝ့ၫလၧ ဆၧကၠၧၫ့ထူၭ နီၪလီၫႉဂၪ့ခိၪယီၩ ၦၡၩကၠၧၫ့ခိၭအဝ့ၫနီၪအီၪနးဂၩအ့ၬ စွါဘဲၫႉ

ကနံၩနီၪတၭ ဆၧကၠၧၫ့ထူၭလဂၩ လ့ၩထီၩ့လၧဂၠဲၩ့ဘံၩအနဲၩ့ထံၭအခၫ ဒၪခိၭဘွၩကထံၭတၭ ယိစိၩဝ့ၫအခၫ ဒၪလၫ့စိၩခိၭဘွၩၥၪၥံၪနီၪ ကမိအၪ့ဝ့ၫအၪမၬ လါနၫ့ ကဘၪထၪ့အၪ့မၩဝ့ၫနီၪ ကၠၧၫ့ဘိၭ လ့ၩမံၫနၩ့အီၪလၧ ခိၭထံၭအဖၫ့လၬနီၪဂီၩ့ အၩ့လၫ့ထၬအနိၭ ခိၬဝ့ၫ လါနၫ့ လံၩဂဲၫလၫ့ကထုၪ့ဎး ခိၭဘွၩၥၪ လၩ့ထ့ၬဝ့ၫဒၪကဖျိၪ့လီၫႉ ကထုၪ့ဎး စကၠၧၫ့ထူၭလဂၩ ကိၭၡါထၪ့အလူ ဝ့ၩယါ ဆၧလီၫပၠိၬ ဆၧလီၫခဲၫ့ ယၥံၫယူၭ အမ့ၬအနၪမုၬလၧၩ့အ့ၬႉ

 လၧကိၭၡါဘၪအလူအီၪကနၧၩ့ဧၪ ဘဲၫအဝ့ၫစီၪထၬအၥိၭ ခိၬၥၪနီၪ မွဲဂဲၫထဲၩ့လၩ့ထ့ၬလၧ အဝ့ၫအနိၭဖၧၩ့အ့ၬဂီၩ့  လၩ့ထ့ၬဘၪလၧ အဝ့ၫအခၪ့ထၬဖၧၩ့ဘိၭ ဆၫလၥၨၩ ႉ အူၭလၥၨၩႉ ဘၪထိးဝ့ၫဂ့ၩဘၪစဲၪ့ ႉ စကၠၧၫ့ထူၭယီၩ ၥၭထၪ့ဘိၭ ကဲ နကဲၪဖိၭဘယီၩဒ့ၭနီၪ လ့ၩ စံၭဆၧဘနီၪဂီၩ့ ခိၬဘွၩၥၪနီၪ ခွံၬၡိၬဝ့ၫလၧ ဂၠဲၩ့ဘံၩဖၧၩ့ကထုၪ့လီၫႉ ဂဲၫထဲၩ့လၩ့ယွၩဝ့ၫလၧ ထံၫကၠၧၫ့ကၠၧၫ့ ခိၬဘွၩၥၪယီၩ ထီၩ့လၧ စဎွၩအဖိၪမုၪ ၆ ဂၩ အၪ့လုထံၫအလး ဘံၩနဲၩ့ထံၭနီၪလီၫႉ

ကထုၪ့ဎ စဎွၩအဖိၪမုၪ ၆ဂၩယီၩ ပၧၩကမိအၪ့ ယၧၩကမိအၪ့တၭ အၪ့နၩ့ဝ့ၫၥ့ၪအ့ၬဘိၭ အဝဲမုၪအဎိၩထုၬနီၪစံၭ ကဲ အၪ့နးဂၩလဂ့ၩ ပကဒုၭအၪ့အီၪထးလၧဂံၪ့အိၩ နးဒၪဘၨၩနီၪလီၫႉ အနီၪဘိၭ အဝဲမုၪလဖၪနီၪ လီၩဆၧနးမံၩ့လၧၩ့ဘိၭ ထဲၩ့ဒုၭအၪ့ကၠၭ အဖုမုၪဒၪဘၨၩလၥၨၩ ႉ အၪ့ဝ့ၫဂီၩ့ယံၬအ့ၬ အီၪလၩနံၫဘံၪ့ ၥၧၫ့ဘံၪ့အခၫ နးဒၪဘၨၩယီၩ ဂဲၫဒၧၩ့ထၪ့ကထုၪ့လီၫႉ စဎွၩနီၪ ၥၭထၪ့စံၭဆၧ ယဖိၪမုၪအဆံၭထုၬယီၩ အဆၧခွၫ အဆၧအဲၪတၩ့ၥံၪခီၫအီၪအ့ၬ ဘၪန့လဲၪဘၪဒၧၩ့ မနဒၧၩ့လၧမပၫလဲၪ အၪ့စၪ့ဝ့ၫခိၪမၪခိၪမၪလါနၫ့ နးဒၪဘၨၩနးဆ့ စံၭဆၧၫ့ထဲၩ့အဖါကဘၪပၥ့ၪလဲၪ ၦၡၩအခွၫမွဲဖီၪ့ယံၫယါအဝ့ၫအစူၪနးကၠၪထယၫႉ အဖါစဎွၩနီၪစံၭ အ့ၩ အ့ၪမွဲနလလီၩဘၪ ယကအီၪက့ၪထၬနၧၩလၧထီၫ့ဖၧၩ့ႉ အခံၫ့ထၪ့ဘၭအခၫ နးဒၪဘၨၩယီၩ အီၪဖျဲၪဝ့ၫဒၪ အဖိၪအခွၫနီၪလီၫႉ