ဘၪထွ့ၫလၧ ၥၫ့ဎွၩဖရၫ့စံအဆၧလ့ၩဆၧထဲၩ့လၧ Asia ဒဲ Oceania အဖၧၩ့နီၪ ၦဎြံၬဖိၪၥံၪလဖၪ ကန့ထၪ့ဘၪ ဆၧဆူနဲၩအဆၧၥ့ၪယၫဒဲ ဂဲးဘၭအဂဲး ကၫဒံၫနဲၫ ခၠၩစဘိၫနီၪ စံၭဝ့ၫဒၪနီၪလီၫႉ

“ၥၫ့ဎွၩအဆၧလ့ၩဆၧထဲၩ့လၧ ခးအ့ၩၡၩဖၧၩ့ကဘျၩ့ယီၩနီၪ ခးအ့ၩၡၩဖိၪၥံၪအဂး ဆၧဆူနဲၩ အဂဲးကဆီၪ့ထၪ့ဒဲ ဆၧဆူနဲၩဆၧၥ့ၪယၫနၪၥ့ၪလဖၪ ကဒိၪထၪ့ဝ့ၫလီၫႉ ဘၪနီၪလဲၪစွါဘဲၫ ၥၫ့ဎွၩအ ၥုၪ့အၥၭနီၪ လယဲၩ့ဘၪလၧ ခးအ့ၩၡၩဖိၪၥံၪအကၠီၩ့ ၥၫ့ဎွၩအဆၧလ့ၩထဲၩ့ယီၩ ဖ့ၪနဲၪပၧၩအဂဲးႇ ခးအ့ၩၡၩဖိၪၥံၪအၪဒၪဆၧနီၪ ဒၪဘၪဒဲနါဂၧၫ့ဘၪၥၫ့ဎွၩအဂဲးအဖးလဖၪ လၧဆိၫၡဲၫမံၫဒံၫယၫအဖၫ့ ခိၪလီၫအကၠီၩ့တၭ ဆၧအယီၩမီၪ့ဎီၩ့ဒၪ အဝ့ၫၥံၪလၧၥၫ့ဎွၩအကျၩ အဆၧၩ့ယဲၩ့ဝ့ၫဒၪအဂဲးႇ ဘဲၫယီၩနီၪ ၡၩခမျၧးၥံၪ ကဒၪဘၪၥၫ့ဎွၩလၧခီၫ့အကၠီၩ့ အၥုၪ့ၥၭဂဲၩဝၭထၪ့ကၠၭယူၭအဂဲးႇ ၡၩခမျၧးၥံၪယီၩ ကန့ဘၪ ဆၧဆူနဲၩဂဲးဘၭအၥၫ့လဖၪနီၪယနဲၩအဂဲး” ခးအ့ၩၡၩၥၫ့ခိၪဒိၪခရၧၫ့ FABC ခိၪနါဒိၪထုၬ ကၫဒံၫနဲၫခၠၩ ယီၩ စံၭဝ့ၫလီၫႉ

 ၂၀၂၄နံၪ့ လၩစဲၭတံၫ့ဘၧၫ၂ၥၫ့ ထီၩ့စိၩလၧ၁၃ၥၫ့အထီ ၥၫ့ဎွၩကလ့ၩဂၭကွ့ၩစိၩလၧ အင်ဒိုနီး ရှား၊  စင်္ကာပူ၊  အရှေ့တီမော ဒဲ ပါပူအာနယူဂီနီ ထံၫခးလဖၪဂီၩ့ ဆၧလ့ၩဆၧထဲၩ့အယီၩနီၪ မွဲလၧၥၫ့ဎွၩအဆၧလ့ၩထဲၩ့ထံၫယဲၩ့ခးယဲၩ့ ၄၅ဘျၩ့လဘျၩ့နီၪလီၫႉ

ခးအ့ၩၡၩ အဆၧလၩ့ဆၫ့လၩ့မဲၩနီၪမွဲလၧ လုၫလါလဖၪႇ ဆၧးဎံၪဆၧးလၩလဖၪႇ ဆၧဘိၪ့ ဆၧဘၩလဖၪ လမီၪ့ဎီၩ့ဘၪလိၬၥၭလီၫအဂဲး ကၫဒံၫနဲၫယီၩဆုးထဲၩ့စံၭဝ့ၫလီၫႉ

ခးအ့ၩၡၩဖၧၩ့ ကၭၥလံၬၥၫထနၫလဖၪနီၪ ဆံၭဝ့ၫဒၪလါနၫ့ လၧၥုၪ့ဆီၪ့ၥၭဆီၪ့အဖၧၩ့ နုၬလၩ့ ဂဲၩဝၭကၠၭဝ့ၫနီၪလီၫႉ ၡၪ့ယၬမွဲဂ့ၩႇ ကဲၪဒိၪမွဲဂ့ၩႇ ၦၡၩၡၩမွဲဂ့ၩႇ ၦၡၩအၪမွဲဂ့ၩႇ ထံၫခးအၪဒၪဆၧနီၪ ဘၪ ဒၪဆၧၫ့ယၫလၧ ဆၧအၪ့ထၩလဖၪအီၪလါနၫ့ အဝ့ၫၥံၪအဆၧဆူနဲၩနီၪ ဂုးခၧၫ့ဝ့ၫဘိၩ့ဒံၭအဂဲး ကၫဒံၫ နဲၫယီၩ စံၭဝ့ၫဒံၭနီၪလီၫႉ

လ့ၩၥုၭအီၪထဲၩ့လၧထံၫခးဂူၫဂၩ ခးအ့ၩၡၩဖိၪလဖၪနီၪ အဝ့ၫၥံၪအဆၧဆူနဲၩ ဆုးထဲၩ့ဂုးခၧၫ့ဝ့ၫ လီၫႉ လၧအဝ့ၫၥံၪလ့ၩထီၩ့အလးလဖၪဖၧၩ့ လၧဆၧဆူနဲၩဖၧၩ့ အီၪအၪ့လ့ၩထဲၩ့ကၠၭဝ့ၫဒၪနီၪလီၫႉ ခးအ့ၩၡၩဖၧၩ့ ကဂၩဒဲကဂၩအကျၩ စူၭကီၪ့မၩဎိၭလၩ့ဆၧကၥ့ၪအဂးႇ ကၩ့ကၩဎိၭလၩ့ဆၧကၥ့ၪအဂး ကဂၩဒဲကဂၩ ကယူၭယၪ့လိၬၥၭအဂး ၥီၪ့ၥၫ့ထၬကၠၭအၥၭနီၪလီၫႉ အကၧၩ့ဒိၪထုၬနီၪ ဆၧကၪဆၧဂဲၩ အကျၩ ကဘၪအီၪမၧၫ့ကၠၭအၥၭ ဘဲၫထၧၫ့ဖုဝဲအၥိၭနီၪ မၩလိၪထၬကၠၭဝ့ၫလီၫႉ ဆၧယိထွ့ၫထဲၩ့ ခိဆၧၩ့ချံၫ့ဒဲဂၪ့ခိၪနဲၩ့ဎီၩ့အဂးနီၪ ပဆၧၫ့ထုၪ့ယိထၪ့ကမံၩ့လီၫ လန့လၧၩ့ဘၪတၭ ၡၩခရၧၫ့ခံးဂးဒဲ ခိဆၧၩ့ချံၫ့အနိၪ့လဖၪအဖၧၩ့ ပကဘၪနုၬလၩ့ဂဲၩဝၭဂ့ၩဂ့ၩဘၪဘၪ ကလိၫဝ့ၫဒၪလီၫႉ ထံၫခးဖၧၩ့ဒဲ ထံၫခးချိၫ့ ဆၧမၩဂ့ၩထၪ့ဆၧလဖၪ ကကဲၪထၪ့အဂး ခးအ့ၩၡၩ ကၭၥလံၬၥၫ့ခိၪဒိၪလဖၪနီၪ အကၧၩ့ဒိၪကဘၪနုၬလၩ့ပၫဝ့ၫကလိၪအဂဲး အဝ့ၫယီၩဆုးထဲၩ့စံၭဝ့ၫဒံၭနီၪလီၫႉ

နးအဲၪဖီၫဘွၩ