မုကနံၩယီၩ ယအဲၪဒိၭလီၩၥ့ၪယၫအ့ၪဘၪနၥံၪနီၪ မွဲဝ့ၫဒၪလၧ ပကဘၪဆူနဲၩလၩ့ပၥၭ ဒဲ ပကဘၪအီၪမၧၫ့ ဘဲၫပနၫ့ဆါဒၪပၧၩအၥိၭအဂဲးနီၪလီၫႉ ပကဲၪၦၡၩကမံၩ့နီၪ ဆၧဆူနဲၩလၩ့ၥၭကဘၪအီၪဝ့ၫဒၪတၡါၡါနီၪလီၫႉ

ဘၪထွ့ၪလၧဆၧအဂဲးယီၩနီၪ ယအဲၪဒိၭလီၩၥ့ၪယၫအ့ၪဘၪနၥံၪ ဆယ်လီနာဂိုးမက်အဂဲးနီၪလီၫႉ အဝ့ၫ အမိမိနီၪ အၥၭအီၪ၁၆နံၪ့အထီ အီၪဖျဲၪထၪ့န့အဝ့ၫနီၪလီၫႉ အဝ့ၫယီၩအၥၭအီၪ ၇နံၪ့အခံၫ့နီၪ ၥ့ၪယၫလၩ့အၥၭ လၧ ကမိကဲၪဎံၪလၩမုၪကဂၩဒဲ အၥၭအီၪ၁၁နံၪ့အခၫနီၪ ကမၩထၪ့ဆၧမၩအနီၪအဂး အဝ့ၫယီၩအဆၧၥ့ၪဆၧဘၪ အီၪ လၧၫ့ဎွ့ၩအ့ၬအဂဲး Directorကဂၩနီၪ စံၭဘၪဆယ်လီနာဘဲၫနီၪလီၫႉ

ၦၡၩကိဂၩဒ့ၭနီၪ ကဘၪထိးစံၭယံၩယါအၥၭ နမၩမွဲကန့အ့ၬ နလးခဲၫ့ၦၡၩကမၩဆၧၩ့နၧၩကျိၪစ့ၩအီၪ အ့ၬဘဲၫနီၪလီၫႉ အ့ၪမွဲၦၡၩစံၭပၧၩ နမၩန့အ့ၬ ဘဲၫနီၪစွါဘဲၫ ပဆၧဆူနဲၩကလၩ့မါဂီၩ့ ပကလၩ့ထံၩဖါနီၪလီၫႉ အဝ့ၫဆ့ လၩ့ဘူၭကလၩ့ထံၩဖါလီၫႉ လါနၫ့ အဝ့ၫအမိနီၪစံၭအဝ့ၫ တခၩၦၡၩကစီၪပၧၩ ကလီၩပၧၩဆၧနးမံၩ့ ခိၭနၪလဂ့ၩ အကၧၩ့ဒိၪထုၬနီၪ ဆူနဲၩလၩ့နၥၭလဆိၩယၫလီၫႉ ထီးလခဲၫ့၂ နံၪ့အခၫနီၪ အဝ့ၫယီၩ ဒိၪဘၪဆၧဂၩ့မၧၫ့လၧ အရ့ၩဒိၪ ထုၬဎံၪလၩ့မုၪအလးနီၪလီၫႉ အဝ့ၫယီၩအ့ၪမွဲ လဆူနဲၩလၩ့ဘၪအၥၭစွါဘဲၫ ဆၧအယီၩ မွဲကကဲၪထၪ့အ့ၬႉ

ပဝ့ၫၥံၪယီၩ ဘဲၫပကကဲၪထၪ့ ၦအဂ့ၩန့ဘဲၫယီၩအဂးနီၪ ကဂၩဒဲကဂၩ မွဲပကဘၪဖ့ၪဂဲးဖ့ၪဘၭလိၬၥၭ နီၪလီၫႉ လခဲၫ့အကၧၩ့ဒိၪဝ့ၫဒၪကမံၩ့နီၪ ၦၡၩအၪ့မၧၫ့ပၧၩအီၪအၪ့လ့ၩထဲၩ့ဘဲၫနီၪ မၩဘဲၫနီၪ မၩဘဲၫယီၩၥ့ၪနီၪလီၫႉ ဆၧအနီၪလဖၪနီၪ အ့ၪမွဲလဘၪဆုးဘၪလၧ ပအခၨၬနီၪ ပဘၪလီၩ့ခိၭနၪလလိၪဘၪလီၫႉ ဘဲၫၦၡၩအၪ့မၧၫ့ပၧၩ အၥိၭအ့ၪမွဲပကအီၪအၪ့လ့ၩထဲၩ့စွါဘဲၫ လခဲၫ့နီၪ ပၧၩဒၪပၧၩပကလၩ့မါခွံၬနီၪလီၫႉ ဆၧနီၪအကၠီၩ့ မွဲလၧၦဂူၫဂၩ အဆၧ ဒၪအဂး ထီးအၪ့လဲၩ့ထၪ့ပၥၭနးမံၩ့လဂ့ၩႉ အီၪဘဲၫနအီၪၥ့ၪအၥိၭလါဆံၭႉ လါနၪ့အီၪထၧၩ့လဘၪထံၭဘၪဆၫဘၪ ၦဂူၫဂၩအဖၧၩ့ဆံၭႉ

လခဲၫ့ထုၬအကၧၩ့ဒိၪထုၬကမံၩ့နီၪ ပဝ့ၫၥံၪအကျၩ ကဂၩဘၪကဂၩအအီၪ မွဲပကဘၪအၪ့န့ဆၧမၩလိၪႇ ပကဘၪအဲၪကွံၩလိၬၥၭ ဒဲ ပကဘၪဖ့ၪဂဲးဖ့ၪဘၭလိၬၥၭအဂဲး ဆယ်လီနာဂိုးမက်စ်စံၭဝ့ၫဒၪနီၪလီၫႉ ပဆူနဲၩဝ့ၫနီၪ မၩထၪ့ဂီၩ့ အီၪဘဲၫပနၫ့ဆါဒၪပၧၩအၥိၭ ဒဲ ပကဘၪဖ့ၪလၩဖ့ၪဖၩ့လၩ့ပၥၭအဂဲး အဝ့ၫယီၩစံၭဝ့ၫဒၪနီၪလီၫႉ