တဝၫ့ကတဝၫ့ဖၧၩ့ ၦၡၪ့ဖိၪ ထၧၫ့ဖိၪဖါအီၪဝ့ၫဒၪနီၪလီၫႉ ၦလၧကဲၪဖါနီၪ ဘၪလီၩ့အၪ့လံၩ့လၩ့အၥၭ လၧၦၡၩအအီၪဂီၩ့ ဘၪမၩဘုၪလၩ့အဖိၪမုၪ လၧဆၧၡၪ့ၡၪ့ယၬယၬအဖၧၩ့နီၪလီၫႉ ကနံၩတၭ ၦလၧကဲၪဖိၪမုၪနီၪ ကမိမၩပလူၭဂ့ၩဂ့ၩဖိၪကဘံၪ့အကၠီၩ့ အၪ့မၧၫ့အဖါအၪ့ဎွ့ၩအ့ၪနီၪလီၫႉ

အနီၪအခၫအဖါနီၪ ဖိၪမုၪဧ့ ဖါအထီးအီၪအ့ၬနဲၪ ဖါကမိဎွ့ၩအ့ၪနၧၩလါနၫ့ ဖါအထီးအီၪအ့ၬ ဖိၪမုၪဧ့ႉ ဖိၪယီၩ နါဂၧၫ့အဖါအဆၧချဲၩ့ဘဲၫနီၪအခၫ အၥၭထၪ့ဒိၪဒိၪဒ့ၭဂီၩ့ ဖါဧ့ နၧၩဝ့ၫယီၩ အယီၩမၬနဎွ့ၩအ့ၪယၧၩန့အ့ၬ နဘၪၡၪ့ၥံၪယၬၥံၪထဲနီၪ ပလူၭကဘံၪ့မၬ နဎွ့ၩအ့ၪယၧၩန့အ့ၬဂီၩ့ ဘၪလၪနဘၪအၪ့လုလၩ့ထၬယၧၩနီၪ. ယဘၪဂဲၫကဲၪထၪ့နဖိၪနီၪ ကမွဲဒၪယဆၧဘိၪ့ အၧၩ့အီၪအကၠီၩ့လီၫႉ ၦၡၩအဂူၫဂၩ တခၩကမိမၩဆၧနးမံၩ့ အမိအဖါၥံၪ မၩအ့ၪန့ကိၭမံၩ့. နၧၩဝ့ၫ နဖိၪအီၪယၧၩကဂၩလီၫမၬ နမၩအ့ၪယၧၩဆၧန့နးမံၩ့အ့ၬႉ  နမ့ၬမဲအ့ၬဧၪ

လီၩအဖါဘဲၫနီၪဂီၩ့ ထဲၩ့ကထံၪလီၫႉ အဖါဝ့ၫ နါဂၧၫ့ဘၪအဖိၪအဆၧချဲၩ့လဖၪဂီၩ့ အၥၭဘၪထံၭဝ့ၫဒဲ ဂၪ့ဝ့ၫဒၪဒိၪဒိၪဒ့ၭ နီၪလီၫႉ

လခဲၫ့နီၪအဖါနီၪ မၩဆၧမၩမုနၩမုဆၫနီၪလီၫႉ ကနံၩကိ မုလါအဖိၪမုၪကဲၪထၪ့ဘၪ ၦကိၪ့ၥ့ၪဖိၪကဂၩအကၠီၩ့ ဒုၭလ့ၩ ထၪ့အဖိၪမုၪဆၧမၩလိၪလၧ မီၠၩ့မၠၭဝံးနီၪလီၫႉ အဝ့ၫခီၫနီၪဘိၭ အၪ့ၥၭထူၬအ့ၬ အီၩၥၭထူၬအ့ၬ ကျ့ၭစၨၭမၩဆၧမၩလၧ အဖိၪမုၪ အဂးနီၪလီၫႉ အဖိၪမုၪခီၫလ့ၩထၪ့ကၠီးလၧဝံး မၩအၥၭခိၭၦၥထံၫမုၪကဂၩအၥိၭႉ   အ့ၪလိၪထီအခၫမၬ ကိၭချဲၩ့ဒုၪ့စိၩအဖါနီၪလီၫႉ  ဝ့ၩဖါ ယထီးအီၪလၧၩ့အ့ၬ ၥိၩ့အ့ၪယၧၩထီး နး၅လၬလူၬႉ  ဘၪကကၠၪကၠၪ အဖါမီၪ့ဘၪအဝ့ၫ မိချဲၩ့ဒုၪအဝ့ၫအကၠီၩ့ ကိၭအဝ့ၫ ခွ့ၩဒီၪနါအခၫ အဝ့ၫယီၩလဖီၪ့ဘၪဝ့ၫလီၫႉ အနီၪအခၫ ဖါနီၪအၥၭလၩ့ဆါဒဲ အၥၭအုၭဒိၪဒိၪလီၫႉ

ကနံၩတၭဖါနီၪ မၩဆၧမၩလၧခိၭဖၧၩ့အထီ အခိၪနုၬအၥွံၪဖျီၩ့ဖိးထၪ့ဂီၩ့ ၥံၫလီၩ့ကထံၪဎးနီၪလီၫႉ ဖိၪမုၪယီၩ နါဂၧၫ့ဘၪ အဖါၥံၫအဂဲးမၬ ဖါဧ့ ဖိၪမုၪဘၪမၪယူၭ ဖိၪမုၪဘၪမၪယူၭဖါဧ့ ယဂဲၫထဲၩ့အၧၩ့ၥၫ့ထၬဘၪလၧနဖၫ့ခိၪလဖၪနီၪ ဖျါခွံၬယၧၩ လဂ့ၩဖါဧ့ ဖျါခွံၬယၧၩလဂ့ၩႉ ယၧၩယီၩ ယမွဲဖိၪမုၪအအၧၩ့ ကဂၩလီၫဖါဧ့ႉ န့ထၪ့ဆၧနီၫ့ယါဂီၩ့ ဂၪ့ကိၭၡါထၪ့အလူနီၪလီၫႉ

ထၧၫ့ဖုဝဲၥၭဘၪ့ဖိၪၥံၪဧ ပမိပဖါလဖၪနီၪ မွဲၦလၧအလၩ့ယၪ့ၥၭဝ့ၫဒၪ အဒိၪထုၬၦလဖၪနီၪလီၫႉ ဆၧနီၪအကၠီၩ့ အီၪက့ၪဒိၪမိဖါ ယိထဲၩ့ခွါထဲၩ့မိဖါ ဘုၪ့အၪ့ဘုၪ့အီၩထဲၩ့မိဖါလဖၪဂီၩ့ အဲၪကွံၩထဲၩ့ဘၪအဝ့ၫၥံၪ ဂ့ၩဂ့ၩဘၪဘၪလါဆံၭႉ ထီဘဲၫယီၩ ဖိၪအအၧၩ့လဖၪ အီၪအၪထၪ့ဝ့ၫဒၪအဖၧၩ့ ထၧၫ့ပပၫထဲးဎုၬကၠၭဘၪလဂ့ၩနဲၪႉ

နးအဲၪဖီၫဘွၩ