မိဖါၥံၪဧ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪဘိၭ အၪ့အူၭအၪ့ဎၧၩ့ဘၪ နၥံၪအဖိၪအဒံၪ နၭနၭလဂ့ၩႉ ဂီၩ့နီၪ အၪ့ကီၪဘၪနၥံၪအဖိၪအဒံၪ နၭနၭလဂ့ၩအဂဲးနီၪလီၫႉ

စံၭမၭချၭ ပဖိၪပဒံၪယီၩဆံၭဒံၭအခံၫ့ လီၩ့ဝ့ၬလၩ့အ့ၪပၧၩဆၧအခၫ ပကအၪ့အူၭအဝ့ၫၥံၪ အိ ယဖိၪမုၪယီၩ မမွဲမၬလဲၪ ဝ့ၬလၩ့ဆၧၥ့ၪခီၫယူၭနဲၪ ခးၥဲၪ့ဖၧၩ့ ယဖိၪမုၪဖိၪယီၩ အၥ့ၪယၫဆၧထုၬလ့ၬယါဧ့ ဆၧအၪ့အူၭအၪ့ဎၧၩ့ ဘဲၫယီၩအၥိၭနီၪ မငါလါနၫ့ ပအၪ့အူၭအၪ့ဎၧၩ့ဘၪအဝ့ၫၥံၪ ကိၭနံၩဂၫဂီၩ့အ့ၬ အဝ့ၫၥံၪ မၩဆၧၩ့ပၧၩကမံၩ့မံၩ့အခံၫ့ အ့ၪမွဲပကဆုးထဲၩ့အၪ့အူၭအၪ့ဎၧၩ့ဘဲၫယီၩအၥိၭ ကိၭထံၪဒ့ၭစွါဘဲၫ လခဲၫ့ခီၫ ဖိၪၥၪယီၩ  ပလအၪ့အူၭလၧၩ့ဘၪအဝ့ၫကကၠၪ မၩအ့ၪပၧၩလၧၩ့ ဆၧနးမံၩ့လၧၩ့အ့ၬႉ လၧထံၩၥိၭအကျၩဆ့ အဝ့ၫယီၩ ကမိအီၪဒၪလၧၦၡၩအဖၫ့ခိၪလီၫ ကစီၪဎိၩလၩ့အၥၭဂီၩ့ ၦဂူၫဂၩအဂး မွဲတွၭဝ့ၫကၥ့ၪလၧၩ့အ့ၬႉ ဆၧကိၭအမံၩ့နီၪ ကမိန့ဘၪဝ့ၫအနၫ့ဆါကဂၩလီၫႉ ဆၧအၪ့အူၭအၪ့ဎၧၩ့နီၪ ကမိန့ဘၪဝ့ၫအဝ့ၫကဂၩဎးလီၫႉ ၥၭအယီၩ ကကဲၪထၪ့လၧအဝ့ၫၥံၪအီၪနီၪလီၫႉ အ့ၪကဲၪထၪ့ဘဲၫနီၪစွါဘဲၫ လၧနဲၩ့ဎီၩ့ကျၩ မွဲကအီၪဘၪလၧၩ့ အ့ၬႉ ဂီၩ့နီၪ လီၩ့ဖျါလုအ့ၪအဝ့ၫၥံၪအၥၭလု အၪမၬလဂ့ၩမိဖါၥံၪဧ့ႉ ဖျါလုဒၪဘၪဒၪအလးလီၫႉ မိဖါကနၩ့နၩ့ လီၩ့ဖျါလုအဖိၪအၥၭကိၭမံၩ့တၭ အဖိၪအဒံၪဂဲၫဎိၩထၪ့ကကၠၪ မိဖါၥီၪ့ၥၫ့န့လၧၩ့အ့ၬ ဆရၫဆရၫမုၪၥံၪ ၥီၪ့ၥၫ့ န့လၧၩ့အ့ၬႉ  နဲၩ့ဎီၩ့အဂး လၧခဲၫ့နီၪ ကဲၪထၪ့ဒၪဆၧဆူၪဆၧမဲၪလဖၪနီၪလီၫႉ

လခဲၫ့ကမံၩ့နီၪဘိၭ ပဖိၪပဒံၪမၩဆၧၩ့ပၧၩအထီ ကဲၪထၪ့အဖျူၭအဖျါကမံၩ့မံၩ့အခၫ နၧၩယီၩ နအိၭ ထိၭဆၧနးမံၩ့ ဆၧဘယီၩလီၫမၬ ပအၪ့မၧၫ့နၧၩၥ့ၪအ့ၬ နဘၪဆၨၫထဲဖိၩယီၩၥံၪယီၩဒ့ၭကအီၪၥ့ၪဧၪႉ ဘဲၫယီၩ အၥိၭအ့ၪမွဲ ပကစီၪဆံၭအဝ့ၫၥံၪဂီၩ့ ပကအဲၪ့လိၬအဲၪ့ဆံၫ့အဝ့ၫၥံၪခိၭမၬခိၭမၬစွါဘဲၫ အဝ့ၫၥံၪအၥၭဖၧၩ့ ကစီၪလၩ့ၥၭအိၭထိၭဆၧနးမံၩ့အ့ၬနီၪလီၫႉ ဆၧအယီၩကထဲၩ့ပၫဖိၬထဲးအဝ့ၫၥံၪအခဲၫ့ထၧၩ့အၥၭဎိၩထၪ့က ကၠၪနီၪလီၫႉ အနီၪအခၫ အဝ့ၫၥံၪယီၩ ကဘၪမၩထၪ့ဆၧကမံၩ့မံၩ့အဂး မွဲကၥၭမဲၪဆၧနီၪလီၫႉ အနီၪဘိၭ အဝ့ၫၥံၪအဆၧၥၭမၧၫ့ယီၩ လ့ၩထၪ့လ့ၩထီၫန့ နးမံၩ့လၧၩ့အ့ၬလၥၨၩႉ

ဆၧနီၪအကၠီၩ့ စၭထၪ့လၧ ပဖိၪပဒံၪအဆံၭဆံၭအထီ ပၥီၪ့ၥၫ့ထၬအဝ့ၫၥံၪ လၧကၠီၪ့ဖျီၩ့အတီၩအ ဘၪဖၧၩ့ကန့အဂးနီၪ မိဖါၥံၪယီၩအမူၩဒၩအီၪဝ့ၫ ဎိၩဎိၩဒိၪဒိၪဒ့ၭအကၠီၩ့ လၧဆၧထုၪ့ၥုၪ့ထုၪ့ၥၭဖၧၩ့ ကျ့ၭစၨၭ ထၪ့ကၠၭအ့ၪ ဖိၪၥံၪအဂး ကိၭဂၩဒ့ၭလီၫမိဖါၥံၪဧ့ႉ