ပၥၭဂဲၫၡါထၪ့နီၪ မွဲလၧကဆါယွၩအဆၧဆိၪဂ့ၩဆိၪဘွၩအဂဲး လၧဂၪ့ခိၪထၧၫ့ဘံၪ့ယၫ ၥၭၡါလဖၪအဘိၪ့ မုနံၩဖၧၩ့ ဝံးတခိၩ့ ကၭၥလံၬၥၫ့ခိၪဒိၪခရၧၫ့ ခိၪနါဒိၪကၫဒံၫနဲၫခၠၩဘိၫ စံၭဝ့ၫဒၪနီၪလီၫႉ
ဂၪ့ခိၪထၧၫ့ဘံၪ့ယၫ ၥၭၡါလဖၪအဘိၪ့မုနံၩနီၪ ဘၪဆၧမၩလၩမၩဖၩ့ဝ့ၫဒၪလၧ ဝံးတခိၩ့ စံၫ့မ့ၫရံၫကၥံၫဒြဲၫ ၥရိၬလးဝၩ့ဖၧၩ့ လၧ၂၀၂၄နံၪ့ လၩယူၫလဲၫ့၂၇ၥၫ့ လဂီၩ၉နၩရံၫအခံၫ့အိၩနီၪလီၫႉ
“ကယဲပၥၭအီၪဒၪဝ့ၫ ထၧၩ့ကအီၪ ကဆါယွၩနီၪ အီၪဒၪလၧပနဲၩ့ထံၭအဆိၩအကၠၪလီၫႉ အကၧၩ့ဒိၪထုၬ လၧပအၪ့ယိၫခဲၫ့ကံၭ ၦၡၩကအီၪပဲၩထၬပၧၩအခံၫ့ႇ ပၥၭဂဲၫၡါထၪ့အခံၫ့ႇ ပဘၪထိးဆၧစူၭဆၧဆၫအခံၫ့နီၪ ကဆါယွၩ ဒံၩ့အီၪဘူၭလၧပၧၩဒံၭ” အဂဲး ကၫဒံၫနဲၫယီၩ စံၭဝ့ၫဘဲၫနီၪလီၫႉ
ကဆါယွၩနီၪ လခွံၭၡိၬထးဘၪ အဖိၪအလံၩနးကၠၪအဂဲးႇ ပၥၭဂဲၫၡါထၪ့အခံၫ့ႇ ပမၩဆၧ ဖံၭဆၧ လန့နၬ လၧၩ့ဘၪအခံၫ့ ကဆါယွၩနီၪ လယိဘၪ ပနးခီၫ့ဒဲ လစီၪဆံၭဘၪပၧၩအဂဲးႇ လိးဖၭဒိၪလဖၪနီၪ လိးဖိၪလဖၪအဂး မွဲလၧဆၧဒုၭနဲၩဂီၩ့ ခၧၫ့ဝ့ၫဒၪအၪမၬအဂဲး ၥၫ့ဎွၩဖရၫ့စံၭ လီၩလၩ့လါလၩ့ထၬ လဖၪနီၪ ကၫဒံၫနဲၫယီၩ ဆုးထဲၩ့အၪ့နၩ့ လၩ့ဝ့ၫနီၪလီၫႉ
“ၦလၧအယိထဲၩ့ခွါထဲၩ့ ၦၥၭၡါလဖၪ ဘူၭဘူၭထံးထံးလဖၪနီၪ မွဲကဒိၭန့ဘၪ ယွၩအဆၧဆိၪဂ့ၩဆိၪဘွၩ ဒိၪဒိၪအၪအၪလီၫ”အဂဲး အဝ့ၫယီၩဆုးထဲၩ့လီၩဝ့ၫဒံၭနီၪလီၫႉ
“မွဲပကဖ့ၪနဲၪဘၪ ၦၥၭၡါလဖၪ tender love ဆၧအဲၪဆၧကွံၩအဖုၬလဖၪနီၪလါဆံၭႉ ပမၩလၩမၩဖၩ့ ဘိၪ့မုနံၩယီၩလကၭဘၪတၭ ပၥၭဘၪ့လဖၪယီၩ ကိၭနံၩဒ့ၭ ပကဝၩ့ယိထဲၩ့ခွါထဲၩ့ ဖံၫဖူၫၥၭၡါလဖၪလါဆံၭႉ ဖံၫဖူၫၥၭၡါ လၧအၥုၪ့ၥၭလၩ့ဆါလဖၪႇ ဖံၫဖူၫၥၭၡါ လၧအဆၧယိလါ လၩ့မါလဖၪအဂး ပကဖ့ၪလၫ့အ့ၪအဝ့ၫၥံၪ ပအခံၫ့ လဖၪလါဆံၭ” အဂဲး ကၫဒံၫနဲၫယီၩ ဆၫ့ထွ့ၫဝ့ၫဒၪ ဘဲၫယီၩအၥိၭနီၪလီၫႉ
ဂၪ့ခိၪ့ထၧၫ့ဘံၪ့ယၫ ဖံၫဖူၫၥၭၡါလဖၪအဘိၪ့မုနံၩနီၪ ၥၫ့ဎွၩဖရၫ့စံ စၭထၪ့ဂဲၫထဲၩ့မၩလၩမၩဖၩ့ဝ့ၫဒၪ လၧအ ဖီၩ့ခွံၬ၂၀၂၁နံၪ့အထီအိၩဂီၩ့ ဆၧမၩလၩမၩဖၩ့ကဘျၩ့ယီၩအ့ၪပၫထဲးနီၪဘိၭ ဘိၪ့မုနံၩယီၩဂဲၫထဲၩ့မၩလၩမၩဖၩ့ဝ့ၫဒၪ အီၪ လံနံၪ့ယူၭနီၪလီၫႉ မိဖါဘိၪ့မုနံၩဂီၩ့ လၧခဲၫ့ကနံၩ လၩယူၫလဲၫ့၂၇ၥၫ့နီၪ ၥၫ့ဎွၩအီၪက့ၪထၬ ဘဲၫဖံၫဖူၫၥၭၡါအဘိၪ့မုနံၩ အၥိၭနီၪလီၫႉ
နးအဲၪဖီၫဘွၩ