လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Mary MacKillop အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖု ဝဲထံၩၥိၭထီး အလူၬၥံၪဧ့ႇ ၦဆံၫ့ဎံၪယီၩအီၪဖျဲၪလၧ နံၪ့(၁၈၄၂) နံၪ့လၧ ခး Australia နီၪလီၫႉ အထၧၫ့ဖုဝဲ ဎိၬဂၩဖၧၩ့နီၪ အဝ့ၫယီၩ မွဲဝၫဒၪ အဎိၩထုၬ နီၪလီၫႉ ဆၧနီၪအကၠီၩ့ႇ အဝ့ၫအၥၭအီၪ(၁၄) နံၪ့နီၪ ကမၩဆၧၩ့ အထၧၫ့ဖုဝဲၥံၪအဂး ဘၪစဲၪထၪ့မၩဆၧမၩလၧ ဆဲၫ့နီၪလီၫႉ လကၭဒ့ၭဘၪႇ အဝ့ၫယီၩ ကဘၪမၩဆၧၩ့ ၦၡၪ့ဖိၪၥံၪအဂး ၥုၪ့ဆီၪ့ၥၭဆီၪ့ အီၪအၪမၬဒ့ၭနီၪလီၫႉ ၦဆံၫ့ဎံၪ Mary ယီၩ မၩဆၧမၩ အလၩလံၩ့န့ကဒီၪနီၪ အထၧၫ့ဖုဝဲဒဲ ၦၡၪ့ဖိၪၥံၪအဂး မၩဆၧၩ့အ့ၪဝ့ၫ ထီးအလူၬနီၪလီၫႉ
နံၪ့(၈၆၆)နံၪ့ နီၪ အဝ့ၫကၥီၪလိၪလံၬ ၦၡၪ့ဖိၪၥံၪအဂး ဖိၪဒဲဖါနံၫဂၩ ဝဲထၪ့ကၠီးနီၪလီၫႉ လါနၫ့ဂ့ၩႇ အလးလအီၪဒ့ၭဘၪအကီၠၩ့နီၪ စၭဝဲထၪ့ဝ့ၫလၧ စမံၩ့တၩ့ခူၭ နီၪလီၫႉ အဝ့ၫအဖါဖါနီၪ ဘၪကဲၪ ဆၧကိၪ့ဘၪကိၪ့ၥ့ၪ ၦနဲၪလိၪဆၧနီၪလီၫႉ အဝ့ၫၥံၪ ဖိၪဒဲဖါနံၫဂၩနီၪ မွဲဝ့ၫဒၪဆရၫနီၪလီၫႉ ၦဆံၫ့ဎံၪယီၩ ၥီၪလိၪအ့ၪ ၦၡၪ့ဖိၪၥံၪလံၬအခံၫ့နီၪ အၥၭခံဖၧၩ့ အဲၪဒိၭကဲၪထၪ့ မံၭထၭမုၪလဂၩနီၪလီၫႉ လါနၫ့ဂ့ၩ ခး Australia နီၪ မံၭထၭမုၪခရၧၫ့ လအီၪဘၪအကၠီၩ့ ဘၪလ့ၩလၧ ခး Europe နီၪလီၫႉ လယံၬလမီးဘၪ အဝ့ၫကဲၪထၪ့ St.Joseph ခရၧၫ့ မံၭထၭမုၪလဂၩဂီၩ ့ဂဲၫထဲၩ့လၧ ခး Australia နီၪလီၫႉ လၧခး Australia နီၪ ၦဆံၫ့ဎံၪ Mary ယီၩ ကဲၪထၪ့ အဆၫ့လၧၫ့ထုၬ မံၭထၭမုၪလဂၩနီၪလီၫႉ
ၦဆံၫ့ဎံၪ Mary ယီၩ ၥုၪ့ထၪ့ ကၠီးဂီၩ့ ကၧၩ့ထၪ့ St. Joseph မံၭထၭမုၪခရၧၫ့နီၪလီၫႉ လယံၬလမီးဘၪ အဝ့ၫအခရၧၫ့ဖၧၩ့နီၪ မံၭထၭမုၪ အၪထၪ့အၪမၬဒ့ၭနီၪလီၫႉ လကၭဒ့ၭဘၪႇ ဖိၪဎွ့ၫကဒုၩလးဒဲ ၦမုၪၥံၪ ဂဲၫထဲၩ့ ဖီၩ့ဖျ့ၭထီၫဖၧၩ့ကဒီၪ ဆၧအီၪဒုၩလးအဂး ၥုၪ့ထၪ့ထဲၩ့ကၠီးနီၪလီၫႉ ၦဆံၫ့ဎံၪ Mary ယီၩ အဆၧၥၭမၧၫ့ထၧၫ့ဘီၩယၫနီၪ ဘၪဒၪဆၧကၪဆၧဂဲၩအၪမၬဒ့ၭနီၪလီၫႉ နံၪ့ (၈၆၄) နံၪ့ နီၪ ၥုၪ့ထၪ့ထဲၩ့ ဖိၪၥၫအီၪမွံၩလးနီၪလီၫႉ လယံၬလမီးဘၪ အဝ့ၫယီၩ လံၩဘၪလၧ စူၪထွ့ၫလခီၫနီၪလီၫႉ နံၪ့(၁၉၀၉) နံၪ့ နီၪ ၥံၪဖီၩ့ခွံၬဝ့ၫဒၪနီၪလီၫႉ
ၦဆံၫ့ဎံၪ Mary ယီၩ အၥၭမၧၫ့အခံၫ့နီၪ မၩဆၧၩ့ၦၡၪ့ဖိၪၥံၪအဂး လကၭဒ့ၭဘၪႇ ခး Australia အဂး မွဲဝ့ၫဒၪအဆၫ့လၧၫ့ထုၬ မံၭထၭမုၪလဂၩဒဲ ကဲၪထၪ့ ၦဆံၫ့ဎံၪလဂၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ ၦဆံၫ့ဎံၪ Mary အဂဲးအဖး ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ