လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ Philip Maung အဂဲးအကၠီၩ့နီၪလီၫႉ Philip Maung ယီၩအီၪဖျဲၪလၧ ခးပယၩ့နီၪလီၫႉ အဝ့ၫအဖူၫအဖံၫနီၪ မွဲဝ့ၫဒၪ တရူၭဆၨၩနီၪလီၫႉ ဆၧဒုၭဖၭဒိၪနံၫဘျၩ့လဘျၩ့အခံၫ့နီၪ အဝ့ၫအဖူၫအဖံၫနီၪ ဂဲၫၥုၭအၥၭလၧ ခးပယၩ့နီၪလီၫႉ အဝ့ၫယီၩ ဘၪအီၪၡၪ့ၡၪ့ယၬယၬအၪမၬလ့ၬနီၪလီၫႉ အဝ့ၫအဖါဖါနီၪ ဘၪမၩ အၪ့ကၪထိၭအဖံၭဆၧမၩနီၪလီၫႉ အဝ့ၫအီၪဂဲၫထဲၩ့လၧ ကၠီးစွါဘဲၫႇ ဘၪမၩဆၧၩ့အဖါဖါကိၭနံၩနီၪလီၫႉ အဝ့ၫၥံၪအဂံၪ့ဒီၪ့နီၪ ဘၪဒၪဆၧၡၪ့ဆၧနၬအၪမၬလ့ၬအကၠီၩ့ အၥၭဆၫ ခိးဂဲးခိးဘၩ မၩလိၪလံၬနီၪလီၫႉ
လယံၬလမီးဘၪအဝ့ၫ(၁၀)ဖုၫ ဖျီၫ့ဝ့ၫဒၪနီၪလီၫႉ အဝ့ၫကကဲၪ ၥံၪဎွံၪဆရၫအဂး အၥၭလုအီၪဝ့ၫဒၪနီၪလီၫႉ လါနၫ့ဂ့ၩႇ အဝ့ၫယီၩ လမွဲဘၪ ခးပယၩ့ဆၨၩနီၪအကၠီၩ့ ခးပယၩ့ ၦဒိၪၦမုၥံၪနီၪ ထိးဆၧၫ့အဝ့ၫ နးဆံၭအ့ၬနီၪလီၫႉ ဆၧနီၪအကၠီၩ့ႇ အဝ့ၫကမၩလိၪထဲၩ့ တရူၭလံၬအဂး ထဲၩ့လၧ ခးတရူၭနီၪလီၫႉ လါနၫ့ႇ တရူၭလံၬနီၪအဝ့ၫအဂး အဂဲးဆံၭအၪမၬလ့ၬအကၠီၩ့ စဲၪလၫ့ကၠီးဂီၩ့ ကလ့ၩမၩဆၧမၩလၧ ခး (American) နီၪအကၠီၩ့ စ့ၩရၫ့လၩ့အၥၭနီၪလီၫႉ အဝ့ၫဆီၫ့မီၪ့အၪဂၬထၪ့ဝ့ၫလၧ အၥၭခံဖၧၩ့ဆၧကမံၩ့နီၪ ယကလ့ၩလၧခး (American) အဂး ထီးအီၪအ့ၬႇ ယထံၩယၥိၭအီၪအ့ၬႇ ယလ့ၩဘၪအ့ၬနီၪလီၫႉ ဆီၫ့မီၪ့ထဲၩ့ဝ့ၫ လၧခဲၫကမံၩ့နီၪ ဆၧအယီၩနီၪ ယဆၧၥၭမၧၫ့အဂး မွဲဝ့ၫဒၪဆၧအၪ့ထၩနီၪလီၫႉ ပဆၧၥၭမၧၫ့အဂး ပလခွံၬစၨၭဘၪ ဆၧနးမံၩ့နီၪ ပမၩနၧၩခၪ့ဖျီၪ့ဆၧ န့နးမံၩ့အ့ၬနီၪလီၫႉ
လယံၬလမီးဘၪ အဝ့ၫလ့ၩထီၩ့လၧ ခး (American) နီၪလီၫႉ အဝ့ၫအီၪလၧ ခးပယၩ့အခံၫ့နီၪ အမံၩ့မွဲဝ့ၫဒၪ (Maung Phone Lwin) နီၪလီၫႉ လါနၫ့ဂ့ၩႇ (American) ခးဖိၪၥံၪနီၪ ကိၭၦၡၩအမံၩ့လၧ ပယၩ့ခီၫလၥ့ၪဘၪအကၠီၩ့နီၪ အဝ့ၫဘၪအၪ့လဲၩထၪ့အမံၩ့လၧ (Philip Maung) နီၪလီၫႉ အဝ့ၫယီၩမုနၩနီၪမၩဆၧမၩ မုဆၫနီၪ မၩလိၪ ခိၪလၩဘွၩ အဆၧချဲၩ့နီၪလီၫႉ အဝ့ၫဒၪဘၪ (American) ခးဖိၪၥံၪနီၪအဲၪဒိၭ ဂၠပၪ့ အဆၧအၪ့ အၪမၬလ့ၬအကၠီၩ ့ ကဝဲထၪ့ ဂၠပၪ့ ဆၧအၪ့ဆၧအီၩဆဲၫ့အဂး စၭထၪ့ခိးဂဲးခိးဘၩနီၪလီၫႉ
လါနၫ့ဂ့ၩႇ ဂၠပၪ့ အဆၧအၪ့နီၪ အဝ့ၫမၩလၥ့ၪဘၪအကၠီၩ့ ဘၪလ့ၩၥီၪ့လိၪအၥၭလၧ ဂၠပၪ့ ဆၧအၪ့ဆၧအီၩဆဲၫ့နီၪလီၫႉ ၥီၪ့လိၪအၥၭဂီၩ့ ဂဲၫထဲၩ့အၪ့လံၩ့ တၨၭဒုၭဆံၭခိၭဂီၩ့ ဝဲထၪ ့ ဂၠပၪ့ အဆၧအၪ့ဆဲၫ့ အမံၩ့မွဲဝ့ၫဒၪ (Sushi )နီၪလီၫႉ အဝ့ၫအဆဲၫ့အမံၩ့နီၪ မွဲဝ့ၫဒၪ (Hisso Sushi) နီၪလီၫႉ ပကလီၩလၧ ဖျိၩ့ခီၫစွါဘဲၫႇ ဆၧမၩနၧၩခၪ့ဖျီၪ ကအီၪလၩ့ထံးလၩ့ဆ့ၭနီၪလီၫႉ လယံၬလမီးဘၪ အဝ့ၫအဆဲၫ့နီၪ ၦၡၩဂဲၫအၪ့အၪမၬလ့ၬအကၠီၩ့ အမံၩ့ဎိၩထၪ့ဝ့ၫဒၪနီၪလီၫႉ လကၭဒ့ၭဘၪႇအဝ့ၫ ဝဲထၪ့ဆဲၫ့လၧအလးအဂူၫဂၩ န့အၪမၬဒ့ၭနီၪလီၫႉ
ဆၧနီၪအကၠီၩ့ႇ နံၫ့ (၂၀၀၈)နံၫ့ ခီၫ့ၡၩဂး လၩ့ဆံၭလၩ့ယွါအခံၫ့နီၪ ၦလၧအဆၧမၩလအီၪဘၪအဂး အဝ့ၫအဆဲၫ့နီၪဖ့ၪလၫ့အ့ၪၦၡၩဆၧမၩႇ မၩဆၧအ့ၪၦၡၩလၧ ဆၧမၩ န့ဝ့ၫအၪမၬဒ့ၭနီၪလီၫႉ ဆၧနီၪအကၠီၩ့ႇ နံၫ့(၂၀၁၁) နံၫ့နီၪ (American) ခးဒိၪ (Obama) နီၪ ကိၭဖံၭၥိၭအဝ့ၫဂီၩ့ မၩလၩ့မၩဖၩ့အဝ့ၫနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ ခးပယၩ့ဖိၪ Philip Maung အဂဲးအကၠီၩ့ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ