အဲၪကွံၩဘၪထၧၫ့ဖုဝဲၦ ဆူနဲၩဖိၪထီးလူၬၥံၪဧ့ႇ မုကနံၩယီၩ ကၭၥလ့ၬဆၧအီၪကီၪ့ မၩလၩမၩဖၩ့ နၫ့ဆါၥၧၫ့ဂၩယွၩလဂၩ အဘိၪ့မုနံၩလီၫႉ
ကဆါယွၩ လၧပဝ့ၫဒၪဎြံၬဖိၪၥံၪ ဆူနဲၩဘိၪ့ထၪ့ဘၩထၪ့နီၪ နၫ့ဆါအီၪဝ့ၫဒၪ ၥၧၫ့ဂၩ ဒဲမွဲဝ့ၫယွၩလဂၩဎးလီၫႉ နၫ့ဆါၥၧၫ့ဂၩနီၪ မွဲဝ့ၫဒၪ ဖါကဆါႇ ဖိၪကဆါ ဒဲၥၭမုဆံၫ့ဎံၪကဆါယွၩနီၪလီၫႉ
လၧမုနံၩယီၩ ဆၧၥၭထိၬပရၧၫ့အဖၧၩ့ႇ ပနါဂၧၫ့ဘၪ ယ့ၫၡူၬအဆၧချဲၩ့အလးခဲၫ့ထုၬႇ အဆၧချဲၩ့မၪလူၬထွ့ၫလဖၪနီၪလီၫႉ
ယ့ၫၡူၬမၪလူၬထွ့ၫအထံၩအဖျဲ ဘဲၫၥိၭကလ့ၩဒုၭကဲၪထၪ့ ၦဆၨၩကိၭဆၨၩဒ့ၭ လၧအထံၩအဖျဲ ခၫ့ဖျီၫ့လၧ ဆၧဒိၭန့ ဘၭတံၫဇၫ့ ဆၧၥူၫဝၭဆံၫ့ဎံၪ လၧနၫ့ဆါၥၧၫ့ဂၩယွၩလဂၩလီၫႉ
ထၧၫ့ဖုဝဲမုၪခွၫၥံၪဧ့ႇ ပဒိၭန့ဆၧၥူၫဝၭဆံၫ့ဎံၪ လၧနၫ့ဆါၥၧၫ့ယွၩလဂၩအမံၩ့တၭႇ ပကဲၪထၪ့ ယွၩအဖိၪအလံၩအကၠီၩ့ႇ ပကဘၪအီၪၥၭမၧၫ့ဝ့ၫ ဘဲၫယွၩအၥၭအီၪဝ့ၫၥိၭလီၫႉ
နၫ့ဆါၥၧၫ့ဂၩယွၩလဂၩအဂဲးအကၠီၪ့ယီၩႇ ပနၪၥ့ၪလၧၫ့လၧၫ့ဎွ့ၩဎွ့ၩန့နးဂၩဧ့ႉ ယွၩနီၪ အဆၧလၩ့ဆၫ့လၩ့မဲၩ့ႇ ယွၩအဂဲးအဖးႇ ယွၩအဆၧကိၪ့ၥ့ၪလဖၪႇ ဒိၪယိၬနၭမၬလ့ၬအကၠီၩ့လီၫႉ
ကဆါယ့ၫၡူၬဂဲၫအၪ့န့ၦၡၩအဆၧကဲၪႇ ဂဲၫလၩ့ၥီၪ့လိၪနၪအ့ၪပၧၩႇ နဲၪဖျီၪထၪ့အ့ၪပၧၩႇ ဖါယွၩအဂဲးႇ ဒဲၥၭမုဆံၫ့ဎံၪယွၩအဂဲးနီၪလီၫႉ ဖါကဆါယွၩအၥုၪ့အၥၭႇ ယွၩအခံးအဂၩ့ႇ ယွၩဆၧယၫ့ၥုၪ့ယၫ့ၥၭႇ အဆၧအဲၪဆၧကွံၩနီၪ ပဒၪဘၪ လၧဖိၪခွၫယွၩအအီၪနီၪလီၫႉ ဖါယွၩႇ ဖိၪခွၫယွၩႇ ဒဲၥၭမုဆံၫ့ဎံၪယွၩ ကၧၩ့ဖျိၪထၬၥၭ လဖျိၪဎးႇ လၧဆၧအဲၪဆၧကွံၩအဖၧၩ့နီၪလီၫႉ
ပကျ့ၭစၨၭ စီၪဆီၫ့မီၪအၪ့ဎၬထၪ့ ယွၩအဂဲးအဖး လၧခိၪနုၬႇ လၧပဆၧကိၪၥ့ၪကိၪဘၪလါနၫ့ႇ ပနၪၥ့ၪလၧၫ့လၧၫ့ဎွ့ၩဎွ့ၩၥ့ၪအ့ၬႉ ပဘၪနၪၥ့ၪလိၫနးဆ့အ့ၬႉ လါနၫ့ဂ့ၩႇ ပကဘၪဆူနဲၩထိးဆၧၫ့ယွၩ လၧဆၪ့လၩ့ၥုၪ့ဆၪ့လၩ့ၥၭအဖၧၩ့တၭႇ ပကဘၪယိဒီၩ့ နးၥၭၥၧၫ့ဂၩယွၩလဂၩ အဒီၩ့အထ့ၬနီၪလီၫႉ
ဘဲၫနၫ့ဆါၥၭဂၩယွၩလဂၩယီၩႇ အီၪလၧဆၧမံၩ့ဎး လၧအဲၪဆၧကွံၩၥိၭႇ ပဝ့ၫဒၪ လၧအကဲၪထၪ့ ယွၩအဖိၪအလံၩ လဖၪယီၩႇ ကဘၪ ကၧၩ့ဖျိၪထၪ့ၥၭ လၧယွၩတၭႇ ကဘၪအဲၪလိၬကွံၩလိၬၥၭ ဘဲၫယွၩနၫ့ဆါၥၧၫ့ဂၩယွၩလဂၩအၥိၭနီၪလီၫႉ